طمنوني الله يطمن بالكم

[* دانة *]

السلام عليكم
طمنوني ربي يخليكم والله حموت من الخوف
ابني عمره 3 سنوات هو يعجبه يلعب ويركض اليوم العصر جان يلعب اجه عليه كال رجلي توجعني كتله لاتركض اكعد ارتاح وره دقيقة اجه يبجي يكولي .... يوجعني(يعني العضو) وبس يبجي نزعته داشوف ليش شفت المنطقة الي بين فخذه وبطنه من الجهة اليسرة وارمة وقوية راسا وديته لطبيب من وصلنا للطبيب كان الورم رايح وهو فحصة هواية وكومة طرق كالي تابعي اذا هم ورمت وراحت وتكررت يعني فتق بس اذا طولت لمدة ساعة وماراحت راسا وديه عملية لان خطر عليه الطبيب كولش خوفني ابني لحد هسه كل شوية اشوفه مابيه شئ الحمدلله
الله يخليكم بس اريد احد يطمني يعني هذا صح فتق او يمكن يكون تشنج وصعد لفوق رجله
ان شاء الله يكون كلامي مفهوم وعرفتوا شقصد

ادعولي ربي يريح بالكم

[صموووته]

أوي حبيبي ان شالله ما عنده غير العافيه يارب
الله يطمن قلبج علي

[sara201012]

ها عيني شلون صار الصغير طمنينه عليه والله ضل بالي

[ضوء النجوم]

عنده العافية ان شاء الله والله خطية

[* دانة *]

ربي يطمن بالكم والله الحمدلله مارجع الورم بعد بس هم خايفة عليه خاف صدك فتق ولازم عملية وهالمنطقة حساسة خاف يغلطون بيها ويصير بيه شيء واتحمل خطيته
ادعولي الله ينطيكم الي تتمنوه

شكرا لمروركم

[* لبنى *]

ان شاء الله ما يرجع الورم و ان شاء الله ما بيه
يمكن وكع عليها و ورمت شويه

[Miss Perfume]

ان شالله ماكو شي لتخافين ميفيد القلق والوهواس
بس انتي ظلي تابعيه وان شالله ماكو شي
زين اذا فتق ليش راح ؟؟
المهم حبي ديري بالج وخلي عينج عليه وان شالله مابيه شي

[شمــوخ ملكــه]

حبيبتي ان شاءالله مافيه ابنج اله العافيه
انتي ابقي تابعيه و لاتخافين اتوكلي على الله
اذا فتق والله سهله لاتخافين وتقولين يسون شي بالعمليه
ان شاء الله مايحتاج للعمليه واذا فتق واحتاج الها والله لاتخافين انا ابني بسم الله عليه
كان عمره 27 يوم وسوينه له عمليه فتق والحمد لله
لاتخافين وطمنينا عليه

[* دانة *]

ربي يطمن بالكم وان شاء الله يحقق كل الي تتمنوه
اشكركم على وكفتكم الحلوة وربي ماراح انساها

ان شاء الله مايرجع الورم الله يسمع منكم

[نورااا]

زين ليش مسويتيله سوناررررررررررر

[* دانة *]

يعني يبين بالسونار اذا عنده فتق اولا ؟

[نورااا]

غير هو الدكتور يوضحلج الطريقه الي تعرفين بيه عده لو لا بس بكل الاحوال والله ميخوف شكد نسمع بيه جهال مسويه وذاكمه واحدهم ميجرعه غير بس الي خلقه لاتخافين عمري

[لينا 2012]

انشاء الله ماعنده غير العافيه

حبي انتي ظلي متابعته واذا يبين بالسونار بعد احسن حتى ترتاحين

انشاء الله مابيه شي

[* دانة *]

مشكورين حبيباتي
الحمدلله هاي صارلة اسبوعين ومارجع الورم الحمدلله والشكر

الدكتور كلشي ماكال لا كالي اخذي سونار ولا شئ بس لطش الكشفية وكلشي ماسوه بس يريد ارجعله وهو ماكو شئ بس خوفنا كال اركضوا بيه على العملية
الله يتكفل بهالطبيب ان شاء الله

[لولوه]

ان شالله ماكو الا العافيه ولا يظل بالج
ويكوم بالسلامه حبيبي
واذا صار شى طمنينى

[* دانة *]

اشكرج عيوني
الله لايشغل بالج على غالي

[JANNAT]

عنده العافيه ان شاء الله

[د.فراشة الليل]

حبيبتي ابنج ماعنده غير العافيه
اطمني ان شاء الله ماكو شي
احتمال اثناء اللعب مضروب عليهه وورمت
لان الفتق ميختفي بسهوله
وتكدرين تلاحظي وهو نايم وتكوليله يكح راح ترتفع المنطقه
واني برأيي مو فتق
وان شاء الله مابي غير العافيه

[Dr.delicate]

السلام عليكم
عزيزتي الغالية بالنسبه لحالة فتق الريح فهذي حاله تبدي عند الطفل من الاشهر الاولى او حتى الايام الاولى وتكون واضحه للام حتى بدرجاتها البسيطه
وتزيد لما الطفل يبدي يبجي او يكح او يلعب ومن ينام ممكن يختفي الفتق
وعلاج عملية بسيطه مثل رفع اللوزتين والتداخل الجراحي الطارئ يكون بحالة نزول الامعاء بداخل الفتق واللي تتبعها حالة انسداد الامعاء وهذي اعراضها كلش واضحه
المطلوب منج عزيزتي انو تنتبهين لمنطقة العانه عند طفلج هو واكف او ديبجي او يكح وراح تشوفين الفتق واذا ظهر عنده هذا الورم فتراجعين طبيب جراح راح يشرحلج خطوات علاجها
اما اذا كان الورم اللي نوهتي عنه مصاحب اله احمرار وكان ظهوره وقتي وبعدها اختفى فهذا احتمال يكون تحسس جلدي او عضة حشرة
ومدام مرجع بعد فلا تخافين
وحتى بحالة فتق الريح اذا مكان واضح بشكل تلاحظي مثل مكلتج ايضا لاتخافين
ان شاءالله صحة وسلامة لابنج الحلو

[* دانة *]

شكرا الكم دكتورات ربي يطمن بالكم
اني ابني هيه مايشكتي ابد من اي وجع الحمدلله
بس اني من كثر ما الاحظة انتبهت انه هذة المنطقة اليسار اعلى من اليمين يعني بس الي يدقق بيها ينتبه عليها ومن المسها احس بانتفاخ بس مو صلب من يمدد يتساوون بس من يوكف تبين الا واحد يدقق بالنظر
هو باليوم ثلاث مرات تصير عنده عملية التبرز

فهذا شنو يعني فتق او شنو؟

[Dr.delicate]

بصراح اني لازم افحص يالله اكولج التشخص بالضبط
اعرضي على جراح اطفال حتى تطمئنين حبيبتي او سويله سونر