هل هذه حاله ام مرض تحتاج لعلاج؟

[* لبنى *]

صباح الخير بنات و الدكتوره


اتمنى اسمع منكم اجابه شافيه و هي انه اني دائما احس بالبرد الفضيع غير عن كل الناس
محد بردان مثلي لدرجة انه ايدي دائما متجمده كأنه طالعه من المجمده
وخاصا هذه السنه لابسه جواريب بالبيت
المشكله مو بالبرد المشكله انه ايدي دا تتعب من البرد محتاجه صوبه متنقله ويايا؟ شنو الحل و هذا مرض يحتاج اراجع طبيب او لا؟
للعلم بيتنا دافي لان جربت من اطلع و ارجع للبيت بالفرق الجبير لان البيت كلش ددافي
و اني مو بس بالبيت بردانه حتى بالشغل جنت دائما لبسي زياده و هما ميتين حر و اني اما يكون الجو طبيعي معتدل او اكون بردانه
نادرا ما حسيت بالحراره و الدفو
بالنسبه للعرق طبيعي و يمكن اقل من الطبيعي
الاكل اكلي صحي و وزني شويه ازيد من الطبيعي
احيانا احس بالخمول ما اعرف اذا هذا اله علاقه باحساسي بالبرد او لا
يا ترى هذه مجرد. حاله لو مرض يحتاج علاج

[zainab_2010]

حبيبتي اني اجاوبج عن خبره
عندي اختي الزغيره عمرها 16 سنه نفس الحاله بحيث اديناتها تصير زرررركه وهي دافيه والبيت بيه تدفئه
بس هي تبرد زياده عنه و24 ساعه لازم التدفئه مفتوحه
راحت وحللت دم وكل التحاليل سوتها طلع مابيها شئ والدكتور كال عادي مابيها اي مشكلة
لان جسم عن جسم يختلف

وانتي اذا تحبين روحي للدكتور وشوفي

وان شاء الله ماكو شئ

[* لبنى *]

تسلمين ورده زنوبه والله اني هم هيجي
مرات ايدي ما تتحرك من البرد و اذا طولت هيجي اشوف و اسوي تحاليل
بس يعني هو اكو هيجي مرض هههههه لو اني امرض روحي بالكوه
يلله شسوي ما الي غير البطانيه

[د.فراشة الليل]

حبيبتي مابيج غير العافيه
ماكو مرض اسمه فرط البروده..هههههه
كل جسم وقابليته على تحمل البرد وانت من النوع اللي متتحملين بروده لا اكثر ولا اقل
بس اكو ظاهره نسميها ryanods phynomenon
يكون بيها نوع من رقة الشرايين والاورده لدرجه متتحمل البروده
وممكن ترحين طبيب باطنيه تشرحيله الحاله وتسوين فحوصات الدم الضروريه للتاكد لا غير
وحاليا مالج غير البطانيه هههههههه

[* لبنى *]

هههههههه تسلمين يا ورده على الرد
اني عاد اشكد احب زيارة الاطباء ... فلهذا اختصرت الطريق و كتبت هنا كلت بلكي اوفر على نفسي روحة الاطباء هههههه بس الظاهر راح اموت برد لان اعرف بنفسي ما اروح اطباء هههههه
تسلمين ورده

[جنة هلي]

بسم الله عليج انى بعد ابرد بس مو دايما ههههههههه يعنى مرات تكونو الى معاى حرانين وكون مثلجه

[الفراشة الحالمة]

هههههههه سبحان الله
اني عكسج مااعرف ليش ماابرد الا قليل
الناس الي وياي يصيحون احنه ميتين برد
واني اكوللهم اصلا الجو طبيعي لو يمكن بي شوي برودة
ههههههههههههههههههههه والناس لابسة بلوزات وملابس شتوية
واني البس ملابس عاديه يعني مو اصواف هعهع

[* لبنى *]

ههههههه الفراشه الحالمه .. حقيقه انتي مثل زوجي و هذا الشي معقدني ... لان اني اتلفلف و هو يصيح حاره افاحو الشبابيك
حتى هذا الشتا ما فتحنا لا مدافئ و لا شي بسببه و اني كضيتها ملفلوفه مثل الدولمه هههههههه

جنه هلي تسلمين قلب .. بلكي يخترعولنا فد صوبه متنقله بالملابس ههههه


شكرا لمروركم و كلماتكم و اعذروني على اهمالي بالموضوع

[Miss Perfume]

شموسة انتي يفيدج العراق بالصيف اعتقد ترتاحين هههههههه

[* لبنى *]

ههههههه هو هناك هم جنت ام بريد ... يمكن الصومال تفيدني

[نور الصباح]

شمووووشة تعالي هنا للامارات حييييل تستفادين
حر صيف شتاااء فرشي بالبالكووون وزوجج جوة على التبريد ههههههههههه
سلامااات عيني

[سهاد العراق]

والله اني نفس الحاله حتى كمت اكره الشته واحب الصيف لان ابد مااتحمل البرد رجلي وايدي ثلج طول الشته وحتى بالصيف باردات مرات

[باربي بغداد]

شموسة اني نفس الحالة بالضبط

طلب الطبيب تحاليل للغدة الدرقية ومطلع شي بس بعدين اخذت فيتاين كومبليكس تروح الحالة يكولون نقص فيتامين b