الي مسويه او اتريد تسوي عملية اطفال انابيب تتفضل

[هيفاء]

بسم الله الرحمن الرحيم
السلام عليكم
بنات شفت هذه الموضوع بأحدى المنتديات وحبيت اسوي مثله بمنتدانه لأنه موضوع مفيد بس ارجو المشاركه حبيباتي يعني الي مسويه عملية الانابيب سواء ناجحه او لا ياريت تحجيلنه عن تجربتهه حته نستفيد كلنه وتكون المشاركه عن طريق الاجابه عن الاسئلة التاليه
العمر
الجنسية
سبب تأخر الانجاب
عدد السنوات التي مرت قبل اجراء العملية
متى تم اكتشاف الحاله بعد الزواج
اين عملتي العملية
عدد مرات العملية (ان وجد )
هل احسستي بالألم عند اجراء العملية وبعدها
هل احسستي بثقل اسفل البطن بعد الترجيع
هل نزلت عليكي افرازات بنيه او دم
ما نوع المثبتات التي استخدمتيها
ما درجة الراحة التي زاولتيها خلال فترة الانتظار يعني راحه تامه , راحه بسيطه , راحه وسط او ما ارتاحيتي
هل اخبرتي احد من المعارف عن العمليه
هل كانت العملية ناجحة
كلفة العملية
هل تفكرين في اعادة العملية
قصة العملية
شنو نصيحتج للمقبلات على اجراء العملية
شنو رأيج بالتجربه


ارجو المشاركه لتكون الاستفادة للجميع

[susu-82]

عاشت ايدج على الموضوع لان انشاء الله ناويه ومااعرف وين اسويها ممكن البنات يفيدونا

[املي برحمتك]

مشكوره حبي عاشت ايدج على الموضوع احنه بامس الحاجة اله
اني ناويه اسوي بالجادرية الاهلي بس بعد مو 100%

[ملكة لكش]

حبي قريبا انزلة موضوع كامل بالخطوات ووالادوية والاطباء والتحاليل من واقع تجربتي وتجربة زوجة اخوية ..اني كاتبتها بمفكرة خاصة وبالتواريخ خلال هذا الاسبوع بس يصيرلي مجال ..تقبلي مروري

[هيفاء]

http://files.fatakat.com/2010/5/1273604409.gif (http://fashion.azyya.com/)

حبيباتي نور الزهراء وصمت الازمان الله يسهللكم امركم يارب

[معلمه]

العمر
اول محاوله اطفال انابيب كانت بعمر 29 سنه
الجنسية
عراقيه طبعا هع
سبب تأخر الانجاب

تكيس المبايض

عدد السنوات التي مرت قبل اجراء العملية

6 سنوات

متى تم اكتشاف الحاله بعد الزواج

ادري عندي تكيس قبل الزواج

اين عملتي العملية

لبنان مستشفى الجامعه الامريكيه بيروت

عدد مرات العملية (ان وجد )

4 مرات

هل احسستي بالألم عند اجراء العملية وبعدها

اصعب شي ويكون الم قوي يوم السحب مؤلم

هل احسستي بثقل اسفل البطن بعد الترجيع

لا عادي وعلى فكره الاجنه تثبت باول ثلث ساعه من الترجيع


هل نزلت عليكي افرازات بنيه او دم

بعدالسحب ينزل شويه دم


ما نوع المثبتات التي استخدمتيها

تحاميل سايكلوجيست وابر وحبوب ساكو يروجونوفا

ما درجة الراحة التي زاولتيها خلال فترة الانتظار يعني راحه تامه , راحه بسيطه , راحه وسط او ما ارتاحيتي

راااااحه تامه بالفراش بعد الترجيع الى يوم التحليل فقط للحمام


هل اخبرتي احد من المعارف عن العمليه

اهلي طبعا

هل كانت العملية ناجحة

نجحت معي من اول محاوله

واخر محاوله الرابعه كانت اجنه مجمده
وصار حمل

كلفة العملية

المستشفى كلش رخيص بالنسبه للي بالعراق يعني كلفه المستشفى اول مره 1100 دولار وكل مره تعيدين المحاوله
يسون تخفيض ورقه
والعلاج تشتري على حسابك


هل تفكرين في اعادة العملية

لااااااااااااااااااا كافي خلص قلبي مرتين يروح الحمل

قصة العملية

عادي بالبدايه متابعه مع الدكتوره بالسونار واخذ العلاج بالابر الى ان يتمم
تحديد يوم العمليه السحب يعني

وبعد يوم يتم الترجيع وبهاذي المرحله تبدين تاخذين المثبتات
طبعا يوم الترجيع يجون الممرضات وينقلوني على سرير ثاني ويدخلوني غرفه ثانيه واظل ساعه وحده ويطلعوني من المستشفى ارجع للفندق واظل نايمه وزوجي خطيه المسكين يظل يداريني ويودي الملابس للغسل ويجيبلي الاكل للسرير
لان بس اني وياه نسافر فيضطر يداريني ههههههه

اوووف ذكرتوني والله قهر
الحمد لله على كل حال

شنو نصيحتج للمقبلات على اجراء العملية

اول شي كلها بيد الله سبحانه وتعالى

وثانيا اهم شي يختارون مراكز موثوقه
لان الشغله دقيقه وحساسه وتحتاج
اطباء اكفاء براي


شنو رأيج بالتجربه

والله مفيده ولواني يروح الحمل مني
بس اكو هوايه ناس صار عدهم بهاي الطريقه

والله يرزقج الجميع بالذريه

[هيفاء]

حبيبتي معلمه مشكوره على مشاركتج والله يرزقج الذرية الصالحه ان شاء الله

[عطر الجنة1]

مشكوره هيفاء على الموضوع
ربي يرررررررزق كل وحدة تتمنه الذريه
دعوت غريب لغريب وان شاء الله ربي يستجاب

[samar333]

طبعا شكر كبيررر للمعلمه على الصوره والايضاحات اني احاول ان ادخل برنامج اطفال الانابيب من 2 سنه بس بسبب ان عمري كبير اخاف من الفشل وكنت اتمنى احد ينصحني على مركز واطباء اكفاء وموثوقين لان وضعي دقيق نتيجه تقدمي بالسن والفرص تكون قليله ان لم تكن معدومه وايضا عندي اصابه بالعمود الفقري
وسمعت عن المراكز في بغداد واربيل وايضا راسلت بعض المراكز وسويت بحوث كبيره وجمعت معلومات حتى ان سالت طبيبات كثير عن هذا الموضوع ..وكان اجابتهم ان موضوع السن مهم
ولذا اتمنيت لو مركز امين يتعامل معي بثقه وامانه
الحمد لله وسؤالي للمعلمه اكدر اذهب الى لبنان واراسل هذا المركز والتكلفه بالعراقي عن العمليه والادويه وماهيه الفتره الي اقيها في لبنان لاني موظفه
واشكر الجميع
واتمنى من الله يمن علي وعليكم بالذزيه

[معلمه]

سمار اني عندي رقم الدكتوره هوايه ناس اخذوا مني واتصلو بالطبيبه قبل ليسافرون
اذا تريدين ادزلج الرقم ع الخاص
بالنسبه لفتره البقاء لازم وضروري توقتين الروحه قبل موعد الدوره بيومين ثلاثه حتى من تجي انتي هناك لان العلاج والمتابعه تبدي من ثاني يوم من الدوره واعتقد من تتصلين بالدكتوره هيه تتحد على حسب حالتك
مده بقاء
بس هيه اذا تبقين للتحليل شهر واذا متنتظرين التحليل لا اقل بس طبعا مجازفه ترجعين بعد الترجيع مباشره

موفقه ان شاء الله عمري

[sheren]

عليكم السلام والرحمة

العمر

33

الجنسية

عراقية جدا

سبب تأخر الانجاب

تكيس المبايض

عدد السنوات التي مرت قبل اجراء العملية

13 سنة

متى تم اكتشاف الحاله بعد الزواج

بعد سنتين من الزواج

اين عملتي العملية

اول مرة باربيل والمرة الثانية بغداد

عدد مرات العملية (ان وجد )

مرتين وناوية على الثالثة ان شاء الله

هل احسستي بالألم عند اجراء العملية وبعدها

بعد سحب البيوض اكو الم ويزول بعد شكم يوم

هل احسستي بثقل اسفل البطن بعد الترجيع

لا ماكو اي شي

هل نزلت عليكي افرازات بنيه او دم

لا ماكو

ما نوع المثبتات التي استخدمتيها

دافستون وسيكلوجست وفولك اسد وابر ما اتذكر اسمها

ما درجة الراحة التي زاولتيها خلال فترة الانتظار يعني راحه تامه , راحه بسيطه , راحه وسط او ما ارتاحيتي

راحة تامة بالمرة الاولى والثانية بعد عمليتي باربع ايام توفت زوجة اخوي
يعني اكيد ماكو راحة والحمد لله على كل حال

هل اخبرتي احد من المعارف عن العمليه

اكيد اهلي واهل زوجي وصديقتي بس

هل كانت العملية ناجحة

للاسف فشلت المرتين

كلفة العملية

العملية الاولى 27 ورقة والثانية خصمو النا 10 اوراق يعني صارت 17 ورقة

هل تفكرين في اعادة العملية

اكيييد

قصة العمليه

المرة الاولى كانت باربيل وبصراحة رغم الادوية والعلاج اليومي بس جو اربيل ميخلي الواحد
يضوج من العلاج بس بغداد تعبت كلش كل يوم اروح للمستشفى اظرب الابر لان جانت الابر تحت الجلد وبالبطن فخفت اضربها باي مكان جنت اضطر اروح كل يوم للمستشفى اظرب ابرة والحمد لله كملت العلاج وتم سحب البيوض وكلشي جان تمام ورغم كل شي فشلت العملية بالمرتين
الدكتور مقبل اعيد العملية مرة ثالثة الا اسوي ناظور رحمي حتى يعرف شنو السبب
والحمد لله سويت الناظور وطلع عندي حاجز بالرحم يمنع الحمل وحسب كلامة نسبة النجاح المرة الثالثة اكثر وبعد ما اجتي الدورة ورحت جان يكلي ما اكدر اسويلج عملية هسا لان عندج ثخن ببطانة الرحم انطاني حبوب منع حمل وكال من تجي الدورة نشوف اذا تسمح حالتج او لا
والله كريم

شنو نصيحتج للمقبلات على اجراء العملية

نصيحتي للكل خلي يجربون ولا ييأسون من رحمة الله حتى لو فشلت مرة ومرتين يبقى الامل موجود بالله اسعى ياعبد وانا اسعى وياك
توكلو على الله ورب العالمين ميفشلنا بجاه مصاب ابي عبد الحسين

شنو رأيج بالتجربه

متعبة بس تستحق المجازفة والتعب


يارب يرزق كل محرومة بجاه شهر محرم

والف شكر هيفاء للموضوع الرائع وان شاء الله يستفاد من تجاربنا

[Dark Spirit]

الله يرزقكم يارب ويسهل امركم
وتفرحونا بخبر حملكم يارب ياقادر ياكريم

[هيفاء]

مشكوره حبيبتي شيرين عالمشاركه يارب ان شاء الله الثالثه ثابته

[white flower]

حياتو هيفاء مشكورة عالموضوع

ربي يرزقنا جميعاً بالذرية الصالحة بالقريب العاجل ان شاء الله

[آآآم محمد]

الله يرزقكم يا بنات بالذرية الصالحه يارب العالمين

[هيفاء]

مشكورات عيوني نورتو الموضوع

[sara201012]

حبايب راجعتلكم بقصتي بس والله من يصير عندي مجال لان كلش مشغولة هالايام بالدوام

[sara201012]

العمر
29
الجنسية
عراقية اكيد
سبب تأخر الانجاب
اني عندي تكيس بالمبايض وزوجي عنده ضعف ودوالي
عدد السنوات التي مرت قبل اجراء العملية
4 سنوات وست اشهر
متى تم اكتشاف الحاله بعد الزواج
اول ماازوجت راجعت
اين عملتي العملية
بغداد/مستشفى الجادرية الاهلي
عدد مرات العملية (ان وجد )
هيه اول مرة
هل احسستي بالألم عند اجراء العملية وبعدها
اويلي على الالم بعد عملية سحب البويضات
مينجرع لانام ولا اكعد متت من الغازات والالم الي بالبطن
هل احسستي بثقل اسفل البطن بعد الترجيع
اي حسيت بثقل والم
هل نزلت عليكي افرازات بنيه او دم
بعد العملية ضلت يومين
ما نوع المثبتات التي استخدمتيها
دوفاستون حبة ثلاث مرات باليوم
تحميله سايكلوكست مرتان باليوم من ثاني يوم سحب البوضات الى موعد التحليل
ما درجة الراحة التي زاولتيها خلال فترة الانتظار يعني راحه تامه , راحه بسيطه , راحه وسط او ما ارتاحيتي
لا والله نفس يوم الارجاع رجعت من بغداد للحلة وتدرون الطريق وجانت نفس اليوم امي جاية من العمرةوطبعا هي متدري اني سويت العملية ورحت يالليل شفتها واجوي بيت جدي وهمين ميدرون فلازم اكعد واجامل والالم جان كاتلني
هل اخبرتي احد من المعارف عن العمليه
لا محد يدري لحد الان بس اهلي وصديقة وحدة من صديقاتي
هل كانت العملية ناجحة
اكيد لا
كلفة العملية
5 ملايين تقريبا
هل تفكرين في اعادة العملية
والله ماادري بس اكيد مااعيدها يمهم
قصة العملية
والله حبي رحت للمتشفى جان دكتور محمد وهو اردني ودكتورة اسراء وهي عراقية سولنا تحاليل الي ولزوجي لان جان ثاني يوم الدورة وزوجي ممتنع 3 ايام
كالو تحاليلي كلش زينه وزوجي عندة ضعف وتشوه بالحيوانات المنوية بس كال الدكتور مو مشكلة نفصل الحيوانات الجيدة
وبلشت بكورس العلاج نفس اليوم
وانطوني كومة ابر يومية اثنين تحت الجلد بالبطن خبط
ووحدة بالعضلة المهم برة 5 ايام الموعد اسوي سونار حتى يشوفون البويضات كبرن لا ويجددون الكورس مال العلاج
طبعا رحت بس صارت عندي الام اسفل البطن كلش قوية كتله لدكتور وسوولي سونار مهبلي كال الوضعية ممتازة
متحتاجين بعد علاج بس نفس اليوم انطاني بعد ابرة وحدة تحت الجلد وابرة بالعضلة وباجر كال استراحة وعكب باجر العملية صادفت يوم جمعة طبعا رحت واني كلش خايفة ويوم العملية ترحين صايمة من الساعة 12 بالليل قبل يوم لان موعد عمليتي ب 12 الضهر ونجيب 27 ورقة اجرة العملية ونكص وصل ب 70 الف تحاليل نفس اليوم الي ولزوجي
المهم طبيت بالوحدة الضهر للعملية وطبعا بنج عام برة نصف ساعة مطلعيني طبعا ماادري بالدنيا ومابيها بس حسيت على صوت زوجي يكعد بيه وجنت ماخذه اختي الصغيرة صف ثالث كلية
كعدت بسالم فضيع اببطني برة ساعة طلعنا من المستشفى وكالو برة يومين تخابرون مختبر الاجنه علمود تعرفون صار عدكم اجنه لولا
طبعا سحبو 14 بويضة مني
برة يومين خابرنه كالو عدكم 5 اجنه ماشاء الله 2 درجة اولى و3 درجة ثانية تعالو اليوم نسويلكم ارجاع بس احنه منكدر نروح نفس اليوم كالو لعد باجر تعالو وموعد العملية بالعشرة الصبح
رحنه ثاني يوم وسولي الارجاع طبعا ميوجع وبدون بنج مثل السونار المهبلي هااااااااااااا نسيت اكولكم يوم سحب البويضات جان دكتور محمد مسافر للاردن ولكينه بمكانه دكتور تيسير هو الي سحب البويضات وهذا يشتغل وية اطياف باربيل وجاي لان محمد مسافر شون لعب
والي رجعلي دكتور محمد كال وضعيتج ممتازو وراح ارجع 5 اجنه يعني كلهم وضليت بالصالة تقريبا 10 دقائق
وبعدين نقلوني لغرفتي ضليت ثلث ساعة نايمة ورحت للتواليت لان تكرمون جنت حيل محصورة لان لازم تكون المثانة نصف ممتلئة قبل عملية الارجاع واني ماقصرت بالمي وراها ضليت الى ان ماكملنا ساعة بالمستشفى واجتي دكتورة اسراء شافتني وكالت كثرو من شرب المي ومارسو حياتكم بصورة اعتيادية بس ممنوع الجماع لمدة اسبوعين الى موعد التحليل
وضليت على المثبتات الي ذكرتلكمياهم
بيوم التحليل مارحت وحللت اهنا يمنه بالحلة وطلع نكتيف المهم ماارتاحيت رحت ثاني يوم الهم جلدي يحكني حتى اخسر 25 الف تحليل حمل عدهم السعر عبالك ديصنعون صاروخ هو تحليل
وهمين طلع نكتيف حجت وياية الدكتورة وكالت ( قدر الله وماشاء فعل ) وانتي جانت وضعيتج زينه والاجنه زينه وعملية الارجاع جيدة ومابيها مشكلة بس شنسوي هذا امر الله
طبعا اني غديت دم وضليت ابجي وجمالة يكولولي تردين تعيدين العملية هذا الشهر كلتلهم لا طبعا
ياحبايبي وهذي هية قصتي الحزينه والحقيقة مومثل الكلام وتعيشون وتسلمون
شنو نصيحتج للمقبلات على اجراء العملية
والله ماادري شكول بس هي محاولة حتى متضل بنفسي واكو هواية بنات يصير عدهم باذن الله
شنو رأيج بالتجربه
تجربة صعبة وحسستني شكد عملية الحصول على طفل صعبة في حين اكو ناس متريد وتستخدم اشكال وانواع الطرق ويصير عدهم وجماله ميردون ويذمرون بس شنسوي هذا امر الله سبحانه وتعالى اولا واخيرا

[املي برحمتك]

حبيبتي ساره الله يساعدج ويزقج الذريه بدون عمليات
قصتج نفس قصة خالتي بس خالتي سوتها بسوريا
وخطية بس انطوها النتيجه سوده عليه ثاني يوم رجعت وهم ظلت نفسيتها تعبانه وبعدين نست وهسه كعدت لان العمر اله اثر

[sara201012]

الله كريم حبي صموته ميصير غير الي رايدة رب العالمين

[هيفاء]

حبيبتي ساره مشكوره على المشاركه وربي يرزقج الذريه الطيبه عاجلا غير اجل ياااااااااااارب

[زمردا]

يسلموووووو حبيبتي على التوبك

انا ناويه اسويها بدهوك مستشفى شيلان مركز بنون والي عدها خبره وتعرف شيء على مركز تحجيلي

ويسلمو

[رشارشيد]

مشكورة اختي

[naznaz]

الله يرزقكم ويرزقني بالحمل سليم عن قريب ان شالله
وانتظروني اكتب تجربتي ليكم

[لينا 2012]

يالله خيتوووو ناز ناز ننتظر التجربه

[ديما77]

بنات اريد اسوى انابيب بس مترددة اسوى هنا يم ابتهاج الالوسى لوبالجنين
لواروح لمروان الحلبى لان العمر ديمشى واحنا كلشى ماكو
لو شسوى مااعرف محتارررررررررررررررررررررررررررةوالله

[هيفاء]

حبيبتي ديما لاتبقين متردده اخذي قرارج وتوكلي على الله لأن مثل ما كلتي العمر يمشي

[حلا الروح]

الله يرزقكم جميعا بلذريه الصالحه عاجلا غير اجل بجاه نبينا محمد صلى الله عليه وسلم

[هيفاء]

مشكوره حبيبتي حلا الروح والله يكومج بالسلامه يارب

[merna]

اختي هيفاء الف رحمه ع والديج ع هذا الموضوع الكلشششش حلو والمميز اتصور اني هم وياكم احتاج لهيجي موضوع وخل نتناقش بكل شي...
ياربي الذريه الصالحه لكم ولي اختكم ميرنا:bf:

[merna]

يا بنات باي مستشفى زين؟ مروان الحلبي؟ لو مستشفى فرح؟ كلولي رحمه ع اهلكم.. لان اني ماتصور حسويها داخل العراق لان كافي الوصاخه بالمستشفيات شنو رايكم انتو؟؟؟ ولو ان حالتي الي دتقودني مو اني الي داختار بس حبيت تنصحوني من تجاربكم سلامي الحار الكم

[merna]

مششكوره اخت شيرين والله يفرحج ويفرحنه امين بجاه هالليله وخلينه ع تواصل فدوه لعمرج اختكم ميرنا

[merna]

الله يساعدج اخت ساره وينطيج الي ببالج وياربي المره الثانيه ناجحه وتفرحين بالنونو بحضنج دعوه غريب لغريب ولتنسوني بالدعاء

[هيفاء]

مية هلا بيج حبيبتي ميرنه نورتينه والله
يمعوده لاتبقين متردده اخذي قرار وتوكلي على الله والله ارحم الراحمين

[merna]

هو هم هيجي كلبي هيفاء شونج؟ شسويتي مسويتي؟؟؟؟
بقيه البنات شونكم

[هيفاء]

هلو حبيبتي ميرنه
والله بصراحه ما سويت شي انه مراجعاتي كلش قليله

[merna]

والله اني داحاول اتحرك هسه لان يكولون انه الانابيب بالصيف احسن من الشته يعني بشهر ال 5 و 6 لان الحراره تقتل البكتريا مادي هالحجي صح لو غلط فدافتش ودانحبش ع شي زين يقنعني مدا الكيه.... بس اريد شي بره لان ماريد هالتجاره قصدي انابيب بغداد والعراق كله شلع كلها تجاره صايره براسنه والله تحياتي

[white flower]

ميرنا عزيزتي إن شاء الله رب العالمين يهديج للشي الزين ونسمع خبر حملج قريباً بحق لا إله إلا الله

[هيفاء]

حبيبتي ميرنه لا تبقين متردده تره الوكت يمشي بسرعه
اذا ما حابه اتسويهه بالعراق فقرري بيا دوله راح تسويهه والله يرزقج وما يضيع تعبج بحق الحبيب المصطفى

[merna]

وايتفلاور صدك وردة انتي
هيفاء كبدبد
انشاله انتضر السلفه مالتي واتوكل ع الله وهم نبقا ع تواصل واوافيكم بالتفاصيل بلكي هناك نلتقي هع هعع اسويلكم واهس تجون

[هيفاء]

يله خلي نروح سويه حته يسوولنه تخفيضات

[merna]

ههههههههههههههههههههه انزول عليج هيفاء
ليششش لا خل نتفق ونروح

[هيفاء]

ههههههههه
صدك ليش لا يله حددو الموعد

[merna]

هههه بالصيف

[هيفاء]

انه سامعه انو بالصيف اتكون الحيامن معرضه للتلف بسبب الحراره ما اعرف اذا جانت هاي المعلومه صحيحه او لا

[merna]

مادري اني مو وياج هيفاء لان سامعه بالعكس