اللي زوجها سبب في تاخر حملها .. تشرفنا وتدخل..؟

[space wamen]

السلام عليكم .. مســاء / صبــاح .... الخير

اخواتي .. ادخل بالموضوووع ... من زوجها عنده ضعف او إنعدام في عدد النطاف

وماذا استعملتم من ادوية , وشنو هي النتائج ..
من طبيبكم المعالج ..؟

ومن حملت .. بعد قدرة الله عز وجل
يعني باختصار اريد تجارب ونصائح

انا متزوجة من ثلاث سنوات ولم يحدث حمل
السبب زوجي عنده انعدام ..الله المستعان:al:

:al:

[Miss Perfume]

حبيبتي ربي يرزقك بالذرية الصالحة وان شالله البنات يتفاعلون وياج

[هنودي]

حبيبتي الله يرزقك الذريه الصالحه اقري يوميه سوره البقره وسوره مريم وسوره الانبياء واكثري من الاستغفار ومن صلاه الليل ولا تجزعي وتوكلي على الله عسى ان تكرهو شي وهو خير لكم الله يعوضج كل خير يارب

[space wamen]

عطوورة .. فديتك والله تسلمين وربي يحفظك

هنوودة .. احلى نصيحة ولله الحمد انا مواظبة واسال الله القبوول والدوام عليها
الله يرزقني ويرزق كل محروومة ..ماقصرتي فديتك

[huda_fm12]

انشاء الله يرزقك ويرزقنا بالذرية اني زوجي يراجع دكتور بشار غانم البرقعاوي بساحة بيروت يكولون زين

[space wamen]

اهلا ..هدى .. اختي ماهي حالة زوجك بالضبط ..؟
وماذا قال له الطبيب ... وماهي الادوية المستعملة
جزيتي خيرا

اختي اكتبي ان شاء الله وليس انشاء الله ..لايجوووز

[huda_fm12]

السلام عليكم زوجي نسبته عشرة فقط وضعف بالحيامن بس مااعرف نوع العلاج الي اعرفة ابر منشطه علماً انه عندة خمس اولاد من زواجه الاول

[الفراشة العراقية]

حبيبتي ربي يرزقك بالذرية الصالحة وان شالله البنات يتفاعلون وياج

[space wamen]

هدى ... هل فادته الابر .. يعني شلونها النتائج الان ..؟

الفراشة العراقية ... مشكورة وربي يسمع منج .. شرفني مرورج

[د.فراشة الليل]

حبيبتي السلام عليكم
الله يرزقج الذريه الصالحه..بس لازم زوجج يراجع طبيب
وهو اللي يشخص الحاله واذا نسبة الحيامن عنده صفر تماما
فالمفروض تسوون اطفال انابيب
وهذا يقرره الطبيب
واذا كنت بالعراق فراجعوا د.بشار غانم مثل ما كالت هدى لانه استاذي وشاطر جدا بهالمجال

[زمردا]

الله يرزقنا ويرزقكم الذريه صالحه يااااااااااارب

بس غير اكو سبب انعدام الحيوانات المنويه

وينطيه علاج الدكتور

شنو سبب زوجج الي انعدمت عنده النطف

اكو كثير امور وتتعالج

[ملاك الحزن]

حبي اني زوجي نسبته صفر وراجعنا اطباء هوايه بس ماكو نتيجة ورحنا على شيخ باربيل وانطانا اعشاب وبعد 6شهور الحمدلله طلعت النسبه 3ملايين بس كلهم ميتين ومشوهين والحمد لله رحنا باثناء الست شهور لمستشفى كمال السمرائي وهناك اكو دكتور اسمه عمار استمرينا ويا وهسه زوجي متحسن هوايه الحمد لله الكميه 2مليون والنسبه 40بالميه حبي هسه هوة مسافر من يرجع ونروحله انطيج خبر روحيله لان المصاريف كلش قليله روحيله والله يوفقكم يارب

[زمردا]

بله م تدخلين رجعيلنا نتيجه واحجيلنا

وشكراااااااا

[ورد]

حبيبتي من ترحون واكو نتيجة كولينة الله ينطيج العافية انشاء الله

[زمردا]

أختي اذا ممكن عنوان شيخ

[عطر الجنة1]

الله يرزق كل وحد محروة بالذرية
الصالحة كولو اميــــــــــن

[املي برحمتك]

حبيبتي الله يرزقج بالذرية الصالحة اني سامعة بدكتور اسمه فاضل فرنكول بشارع الواثق والله يعينج ويقر عينج بطفل

[نيلوفر]

هلو حبيبتي
اني زوجي هيجي وانصحج ترى ميفيد ملشي فقط تلقيح مجهري او اطفال الانابيب والعمليت هاي مكلفة جدا ونسبة نجاحها اقل من خمسين بالمية بس ماكو غيرها لاتحاولين علاج او غيره لان اني زوجي كلما يتعالج يرجع ينتكس وهسة اني بعمان سويت عملية وانتظر النتيجة ويارب خير لان اعصابي انهارت وهاي ثالث مرة اسويها

[space wamen]

السلام عليكم ..

اسُعدتم ..صباحا .. مساءآ ..

كيف الحال ارجوا ان تكوني باحسن حال ..

يعني كلما اغيب اقول راح القى الصفحة مليانه تفاعل .. خخ .. لا واني ام لراهي ..


زمردا ... اسال الله ان يهب لكي الذرية التي تقر بها عينيك .. جزيتي خيرا

ورد .. صمت الازمان .. عطر الجنة .. تقبل الله دعائكن ورزقكن الخير كله
شاكرة مروركن ..

نيولوفر .. حبيبتي الله يرزقك , اني ادري ان الحقن
مجهري هو الحل لكن وووينه .. الا بالسحب او يسوون خزعه او تفتيش للخصية بتاعت زوجي .. واذا لقوا نطاف مكتملة عود يحقنوها في البويضة .. وهذه مالقيتها .. الله كريم

زين اننتي شلون سويتي طفل انبوب وزوجج صفررر ..؟

اختي الللي قالت عن الشيخ اللي باربيل .. والدكتور اسمه عمار ...زوجك شنو حالته بالضبط يع
ني سبب الصفر بالضبط شنووو ..؟
اتمنى الرد

[منى الروح]

الف دعاء وامنية وترجي من الله ان لايحرم اي انسان من اجمل شيئ

[space wamen]

اللهم آمين

ولكي بالمثل

تشكرررات

[space wamen]

السلام عليكم

مستحييل بعد افكر اروح واراجع عند دكتور عراااقي

زوجي اساسا مو مقتنع بس من كثر مااقوله المسكين يرووح
لكن من الان فصاعدا قررت عدم الذهاب لاطباء عراقيييين
مستحيل ناس ماعندهم خبره ابد ولا كانهم درسوا
انا العادية بس مجرد قرات بالانترنت بعض المعلومات عن اسباب العقم لدى الرجال صار عندي تصور بسيط عن كل الحالات وطريقة علاجها والمتبع عالميا اي احدث الادوية ,

بس بالاسم اطباء
يحطمون الواحد ولا كانه الامل بيد الله اولا واخرا
ثم لولا انه عندي انترنت ( تصوروا )
ماكان عرفت انه في شي اسمه البحث بالمكريسكوب عن الحيوان اي فتح الخصية او الخزعه او السحب بالابره
الاطباء العراقيين ماخبروني وقالوا روحو للخارج وسوا هالعمليات لعله تجدون نطاف وتصير طفل انبوب

الله لايكثر من امثالكم .. شوي تطوروا زيدوا تجاربكم اطلعوا للخارج وسوو تجارب وابحاث وشوفوا الطب شلون يطور وماهي اخر الابحاث

تحيآتي

[زمردا]

اختي هو شنو سبب عقم زوجج وليش صفر اخذ علاج ؟؟

سوي حقن مجهري حبي والله يوفقك يااااااااااااارب

[ملكة لكش]

عزيزتي
اني جنت مأيسة وعايفة الموضوع لان كلت صفر مين ايجيبونة وهم البنات بالمنتدى شجعوني ودفعوني اتقدم خطوة للامام وكلت لو تصيب لو تخيب وتوكلت على الله والحمد لله الحمد لله سوينة عملية الخزعة بمراجعتنا للدكتور محمد العبايجي ((عيادة بالاسكان وبالسعدون) وهو دزنة على دكتور علاء سوه لزوجي العملية طلعت النتأئج جيدة وهسة اني سجلت برنامج طفل الانابيب وانشالله الله ميضيع التعب
انصحج لاتكعدين سويها قبل لا يفوت الوكت عليج مادامج اصغيرة لان هسة اني دا اركض لان عمري صار حرج ــــــانشالله الله يرزقج بجاه المصطفى لاني حاسة بيج وبمعاناتج

[ملكة لكش]

عزيزتي
اني جنت مأيسة وعايفة الموضوع لان كلت صفر مين ايجيبونة وهم البنات بالمنتدى شجعوني ودفعوني اتقدم خطوة للامام وكلت لو تصيب لو تخيب وتوكلت على الله والحمد لله الحمد لله سوينة عملية الخزعة بمراجعتنا للدكتور محمد العبايجي ((عيادة بالاسكان وبالسعدون) وهو دزنة على دكتور علاء سوه لزوجي العملية طلعت النتأئج جيدة وهسة اني سجلت برنامج طفل الانابيب وانشالله الله ميضيع التعب
انصحج لاتكعدين سويها قبل لا يفوت الوكت عليج مادامج اصغيرة لان هسة اني دا اركض لان عمري صار حرج ــــــانشالله الله يرزقج بجاه المصطفى لاني حاسة بيج وبمعاناتج

[‏وردة حبيبي]

السلام عليكم بنات اني اول مره اشارك اهنا انشالله يرزق الجميع الذريه الصالحه بنات مدام الله موجود يعني الامل موجود حبيت اطمن الي اعمارهم تتقترب من الاربعين وصير فرص الحمل قليله الي ماعدها معلومه حبيت انوركم واكولكم تكدرون تجمدون مبايضكم لحين معالجة زوجج وتكدرين ترجعيهن ويصير الحمل طبيعي وهاي توضيح اكثر

- تجميد البويضات من مبيض المرأة لاستخدامها مستقبل.
- تجميد أجزاء من المبيض وفي هذه العمليّة يتمّ تجميد أجزاء ومقاطع من المبيض تحتوي على بويضات غير ناضجة وعند الحاجة للبويضات يجري إنضاجها شأنها شأن تجميد البويضات. وعمليتا التجميد هاتين تساعد المرأة على الاحتفاظ بخصوبتها خاصّة المرأة التي تخشى أن تفقد تلك الخصوبة بسبب التعرّض للإشعاعات مثلاً أو العلاجات الكيماوية أو التي تكون على وشك أن تتوقّف مبايضها على إنتاج البويضات.

والي عمرها صغير انشالله مابقى شي ويطبقون عمليات الخلايه الجذعيه لان جربوهه بالاردن ونجحة

[space wamen]

ملكة لكش ... وردة حبيبي


حيآكن الله وبيآكن ..

اشكر تواجدكن وردودكن ..

استفدت منها ...

من سمعت بالمركز البريطاني للعقم وطفل الانبوب في اربيل ..؟...؟؟

[رشارشيد]

الخميس 18 صفر 1433
الله يرزقك ويرزقنا الذريه الصالحه

[naznaz]

اني هم مثلكم
و عملنا مرتين الحقن مجهري بس فشل وماصار حمل والحمدلله

[* دانة *]

مرحبا
اني حبيت افيدج لا اكثر ليش متراجعين مستشفى كمال السامرائي كولش خوش مستشفى وبلاش ماياخذون يمكن الا القليل وعلاجهم مضمون باذن الله ويطولون خلك ومايعوفوكم الا وعدكم حمل باذن الله اني حماتي ظلت 10 سنوات بدون اطفال وحارت شسوت بس بالاخير طلع عدها انبوب مسدود وفتحوه بالحرارة وزوجها كانت عنده دوالي وعالجوها والحمدلله حملت وحتى اقاربنا ايضا عنده ضعف يمكن هم صفر وديتعالج وان شاء الله راح يصيرله طفل انتي راجعي ولاتياسين من رحمة ربج ابدا

الله يرزق كل محرورمة

[ميـــس]

هلاو عيوني

اني زوجي نسبة 25 % وسوة عملية مال دوالي وجان عندة انسداد بألاحليل
وهم سوة عملية بس ورا الدوالي كامت تنزل النسبة دياخذ علاج بس ماكو فائدة
والله اني هم سمعت بهاي الخلاية الجذعية ياخذون من الخلايا الرجال ويجددوها
بس سمعت بأمريكا مو بعمان
اني بيضتي حجمها 23 والاخ حجمها 18 وسويت اشعة ملونة طلعت الانابيب مفتوحة
وسويت مال هرمونات كلها طبيعية ورحمي نظيف
وماعندي اي اشكال
قررنا نروح لايران نسوي عملية اطفال انابيب بس هسة لان باردة واني عندي التهاب قصبات مزمن كل شتة هيج وبس اكح
فقررنا نروح بالصيف
بس ماعرف شو ناس يكولون ايران وناس يكولون عمان
وحايرة هسة اني

يارب يرزقنا بالذرية الصالحة

[املي برحمتك]

شلونكم بنات
اني الاغلب يعرفون قصتي زوجي عنده ضعف العدد 3 ملايين والحركه صفر والتشوهات 75 %
وهسه سوه عمليه دوالي وخزع من الخصيه سواها يم دكتور مهند الساعدي
وهو اخذ علاج يم دكتور فاضل فرنكول وارتفع العدد وصل لل25 مليون والحركه 33%
والتشوهات صارت 20 %يعني زين بس فجأءة صفرت النسبة

[ميـــس]

صموتة حبي هي عملية الدوالي تنزل النسبة

[أشرقت]

صمت شنو العلاج اللي اخذها زوجج من دكتور فاضل ياريت تكتبيه اذا تعرفيه

[املي برحمتك]

حبي هاله مو شرط تنزل النسبة
اكو ناس هوايه صار عدهم واكو ناس مأثرت واكو ناس نزلت يارب احنه تفيدنا
والله الله كريم هو اخذ اكياس مثل الفوار اسمها بيروكسيد
وبعدين انطاه ابر كل يوم سبت واثننين وخميس نوعيه ونوع كل اثنين وخميس
بس الابر ماتذكر اسمها

[naznaz]

ممكن اخت هالة
اذا نعرفين اسعار عملية اطفال انابيب بالايران تكولي؟
ونسبة النجاح عندهم

[ميـــس]

حبي الاسعار هي 30 او 40 ورقة وية السكن

ونسبة النجاح بيد الله
اكو ناجحة واكو لا

بس جماعة كالولي ناجحة

[merna]

شونكم حبايبي الله اني عضوه جديده بالمنتدى
زوجي نسبته صفر بس مو سبب الدوالي ولا الهرمونات بس سبب انسداد الاوعيه والقنوات بخصيه وحده والثانيه معدومه النطف نهائياً
سؤال لكل من ازواجهن صفر والي سوو انابيب.... لمن راجعتو طبيب مختص بالانابيب شكلللكم؟؟ بالنسبه لازواجكم شون سوا العمليه اله؟؟؟؟؟ يعني اخذ خزعه؟ لو سحب لو شون؟ وشكد تكلف عمليته؟؟ طبعا عمليته غير الانابيب مالتنه للمرا اقصد... زين وانطاكم حبوب ادويه لزياده النطف او كثرتها طبعا قبل العمليه الانابيب للرجل؟؟؟؟ ارجو الرد