تمن كلم

[الحمدلله]

سلام عليكم بنات شلونكم مشتاقتلكم ومشتاقه لقسم الطبخ
بعد فتره طويله من الاستراحه:394:بديت ادخل المطبخ
والاكلات الى اشتهيه اطبخه طبعا هم بالكوه بس احسن من قبل
قبل كم يوم اشتهيت تمن كلم مال بى بى :3333333(170):الله يرحمه بس شسوى فكمت وتوكلت عله الله ودخلت المطبخ وسويته والحمدلله طلع كلش طيب
طبعا كلكم تعرفوله بس بيبيتى الله يرحمه جانت تخليله خضره يابسه فجان اله طعم مختلف وريحه طييييييييييييييبه
انى هم سويت نفس طريقتهه
المقادير
تمن
كلم مقطع مربعات صغار و محموس
لحم مقطع مربعات
بصل
بهارات
ريحان وكزبره ومعدنوس وشبنت ومرزه
معجون طماط
طبعا مرات اللحم المفروم نبرش ويا بصل وشويه طحين حمص وبهارات وملح ونسوى دوائر صغار مثل الكفته ونقلى بالزيت ومن صبينه التمن نصفط الكفته فوكا هم طيب
بس انى هالمره سويته ويه اللحم المقطع
الطريقه
نحمس البصل ويه اللحم زييييييييييين وعدنه الكلم لازم هم ينحمس زين حته يصير لين
نضيف الكلم المحموس فوك اللحم ونحمس بعدين نضيفله خاشوكة اكل معجون ونحمس ثم البهارات وشويه حسب الرغبه نومى بصره وثم الخضره اليابسه ونحمس
وره شويه نضيف للمواد شويه ماى ونغطى ونخلى عله نار هادئه حته يستوى
نطبخ التمن ونصفى
نجيب كدر ونحطله زيت ونصفط بيه بتيته مقطعه دوائر
ثم نجيب التمن ونخلى نصه فوك البتيته ونخلى فوك التمن من مواد الكلم وبعدين باقى التمن ونرش فوك التمن دارسين وزيت ونهدره ينوكل ويه اللبن والزلاطه
والللللللللللللللللللللللللللف عافيه
طبعا انى بعدنى عندى مشكله بتحميل الصور وكلما اريد ارفع صور عندى خطا ارجوا المساعده وشكرا

[Lo0oLo]

حبي اني هم مشتاقيلج ومشتاقين لطبخاتج المميزه والبديعه

بس كليلي منين جبتي الكلم ؟ موجود هنا بالسويد اشو اني هم اشتهيته هههههههه

عاشت ايدج حبي

[الحمدلله]

تشتاقلك العافيه حبيبتى ومشكوره عله مرورك
والله اى موجود زوجى جابه من الليدل حته بالماكسى والايكا هم انى شايفه منه ان شاءالله تلكين وتسوين منه كلش طيب وبالعافيه

[سنوبيا]

عاشت ايدج بس اني مااعرف شنو الكلم ؟؟؟؟؟؟؟؟؟؟؟؟؟؟

[الصيدلانيه]

عاشت ايدك الكلم يشبه البطاطا تقريبا بالشكل وقشره يابس جدا
وبالنسبه لمركز التحميل ابحثي على كوكل اي مركز ثاني وحملي الصور انا هم عانيت منه مايرفع الصور
وننتظره مصور بالعافيه

[زوزه]

سنوبيا الكلم ابيض يصير وي البرياني يخلوه وريحته ررررررررررررررررهيبه مثل البتيته عاشت ايدج الحمد لله والله مبين طيب والف رحمه على روح بيبيتج على هالنفس الطيبه

[هباوووي]

عاشت ايدج حبيبتي صدك طيب الكلم صارلي شكد مماكلته هم هو يشبه الجمه

[Lo0oLo]

حبي الحمد لله ممكن تكتبيلي اسمه بالسويدي
حتى باجر اروح للماكسي اشوفه لان ما اعرف شكله بالضبط
تعبتج ويايه حبي

[hala]

http://store2.up-00.com/Jun10/5bJ33790.jpg (http://www.up-00.com/)

[hala]

زوجه الغالي هذا شكله هو عينا مثل الشلغم احنا نسويه للحامض شلغم هم وعاشت ايد الحمد لله ذكرتينا بايام زمان

[‏وردة حبيبي]

يسلموووووووووووووو

[الحمدلله]

بنات مشكوره عله ردودكم تسلمولى
زوجة الغالى ان شاءالله اسالك عن اسمه تدللين

[الحمدلله]

بنات شوفو الصور


http://www.up-00.com/code.php?load=thumbinal&num=OWt37914.jpg (http://store2.up-00.com/Jun10/OWt37914.jpg)



http://www.up-00.com/code.php?load=thumbinal&num=1Ck37914.jpg (http://store2.up-00.com/Jun10/1Ck37914.jpg)



http://www.up-00.com/code.php?load=thumbinal&num=Oin37914.jpg (http://store2.up-00.com/Jun10/Oin37914.jpg)






دوسوا عله الصور حته تطلع:044: