الريل وحمد للرائع مظفر النواب

[مكارم]

هاي القصيدة اللتي تغنى بها معظم المغنين بس اللي اجاده واحد فقط
هو ياس خضر
وانا انقل لكم القصيدة بالكامل
طبعا مو كلها مغناة
بس حبيت اهديها لكل الحبايب المحبين للعراق
طبعا هي باللهجة الشعبية العراقية


الريل وحمد
للشاعر العراقي مظفر النواب


مرينه بيكم حمد، واحنه بغطار الليل
واسمعنه ، دك اكهوه........
وشمينه ريحة هيل
ياريل ...
صيح ابقهر ..
صيحة عشك ، ياريل
هودر هواهم ،
ولك ،
حدر السنابل كطه
************

يابو محابس شذر، يلشاد خزامات
ياريل بلله .. ابغنج
من تجزي بام شامات
ولا تمشي ..مشية هجر..
كلبي ..
بعد مامات
وهودر هواهم،
ولك ،
حدر السنابل كطه .
**************************
جيزي المحطة..
بحزن ..
وونين ..
يفراكين
ماونسونه ، ابعشكهم ...
عيب تتونسين
ياريل .. جيم حزن ..
اهل الهوى امجيمين
وهودر هواهم ،
ولك ،
حدر السنابل كطه
***********************
ياريل ،
طلعوا دغش ...
والعشك جذابي
دك بيه كل العمر ..
مايطفه عطابي
نتوالف ويه الدرب ،
وترابك ..
ترابي ...
وهودلا هواهم ،
ولك ...
حدر السنابل كطه
***********************
انه ارد الوك الحمد .. مالوكن لغيره
يجفلني برد الصبح ..
وتلجلج الليرة
ياريل باول زغرنه ...
لعبنه طفيرة
وهودر هواهم ،
ولك .. حدر السنابل كطه
*****************************8
جن حمد ..
فضة عرس ..
جن حمد نركيله
مدككك بمي الشذر ،
ومشله اشليله
ياريل ..
ثكل يبويه ..
وخل اناغيله ،
يمكن اناغي بحزن منغه ..
ويحن الكطه
**************************
كضبة دفو ، يانهد
لملمك .. برد الصبح
ويرجفنك ، فراكين الهوه .. ياسرح
ياريل ..
لا .. لا تفززهن ..
تهيج الجرح
خليهن يهودرن ..
حدر الحراير كطه
**************************
جن كذلتك .......
والشمس ..
والهوه ..
هلهوله
شلايل بريسم ..
والبريسم اله سوله
واذري ذهب يامشط
يلخلكك ... اشطوله !
بطول الشعر ..
والهوى البارد ..
ينيم الكطه
****************************
تو العيون اتلن ....
ضحجات .. وسواليف
ونهودي زمن ..
والطيور الزغيره ..
تزيف
ياريل ..
سيس هوانه ،
وما اله مجاديف
وهودر هواهم ،
ولك ..
حدر السنابل كطه .
*********************************
*********************
*****************
***********
*********
*****
***

[Queen.Ur.Heart]

ياسلام من اجمل الاشعار
والاغاني
من اسمعها لو بعد مية سنة تطربني

مشكورة ماما شعر يجنن

[مكارم]

مشكوره
حبيبتي انون
والله انا هم مثلج
شكد مااحبها لو اسمعها مره على مره مااملها

رقروقه هذا شعر شعبي بلهجة اهل الجنوب
ياريت يمي اشرحها الج

[غادة الكاميليا]

تسلم ايدج خالتو الشعر يخبل والاغنية بعد تخبل وحنينة..

رورو حبي اشجابج هنا روحي لقسم الفرفشة فرفشي حبيبتي ...

الله يخليج هوة اني نصه مفهمته خخخخخخخخخخخخخخخ

[مكارم]

غدغوده
السمع احسن حتى تفهمين الكلمات
لان الكلمات بالقراءة ممفهومه ولكن حين تسمعين الاغنيه تفهميها اكثر
وتقبلي تحياتي

[مشتاقة للعراق]

تسلمين خالة مكارم الغالية شكد احب هالاغنية ومو بس اني ماما وبابا حييل يحبوهة بس بصراحة اني مو حييل افتهم الكلمات بس اعرف بالاغنية كلها (حمد)بس مع هذا حلوووة وما تنمل

[مكارم]

نورتي غاليتي
ردك اسعدني

[رحيق التقى]

الله صدك حلوة هذه اللهجة تعجبني
وفعلاً بالسمع تنفهم اكثر
مشكورة ماما الغالية تسلمين

[مكارم]

http://iraqiyat.net/up/uploads/images/iraqiyat-f02a8eadd6.gif (http://iraqiyat.net/up/uploads/images/iraqiyat-f02a8eadd6.gif)