المساعد الشخصي الرقمي

مشاهدة النسخة كاملة : تعالي شاركينا تجربة تربيتك لطفلك

um maryam
29-12-2007, 09:28 PM
http://smiles.al-wed.com/smiles/60/7094.gif

اكيد كل وحده منا مرت بفترات صعبه وحالات غريبه في تربيتها لطفلها :3D_Smilies119:
تكلمي عن تجربتك في تربية طفلك لنكون ارشيف او ملف خاص لبقية البنات ومن الممكن ان تكون تجربتلك لها الفائده لام جديدة وتجربتنا ايضا لها الفائده لك :15_1_68v[1]:
تعالي لنتناقش ونتكلم معنا في مشاكلنا ومعاناتنا مع اطفالنا:3D_Smilies26: :3D_Smilies137:
r0r0 aLwarDa
29-12-2007, 09:45 PM
فكره روعه غاليتي ام مريم

انا بلنسبه الي تجربتي في اول طفل ابني الكبير كانت لي مرحله مهمه من حياتي
طبعا الغربه والوحده في بلد اجنبي لعبت اكبر دور بهلشي

انا ماسيطرت عليه من وهوه زغير للاسف.......من ناحية اكل الحلويات ... و العناد .... وعصبيته الزايده.... وتدليله....

اتمنا من كل ام جديده ان تسمع كلام امهاتهه و اخواتهه الي اكبر منهه ومجربين ...... مايصير نعتبر نفسنه كلشي نعرف.....

تربية الطفل صعبه و اول 6 سنواات هيه اهم سنين الطفل لان تتكون بيه شخصيته


ابني طبعا هيه عمره 4 ونص و احاول بهلفتره المتبقيه... اغير من شخصيته و اقلل من عصبيته و عناده بهدوئي ...

الله يعيننا علي تربيتهم ....
um maryam
29-12-2007, 09:51 PM
تسلمين رقية على المشاركة وعلى الكلام الحلو :sfsfsf:
بس ياريت تحجيلنا بتفاصيل اكثر وتحجيلنا شلون دتحاولين هسه السيطره على عناده وعصبيته وشنو النتائج وبلكت تلكين الحل يم وحده من البنات اللي جهالهم اكبر

ومثل مكال ابو المثل
اسأل المجرب ولتسال حكيم :3D_Smilies198:

واني هم ان شاء الله احجيلكم تجربتي ويه مريم مريت بحالات غريبه ولحظات صعبه ان شاء الله البنات يستفادون منه لان صدك اول طفل متعب ويعلمج وانت هم تتعلمين هوايه شغلات :033:
um maryam
30-12-2007, 01:39 AM
هاي وينكم اشو ماكو احد شارك يله هسه اليوم راح اكتبلكم قصتي او بالاحرى مغامراتي ويه بنتي الحبابه :11_1_202[1]:
اولا نصيحتي الاولى لكل وحده تصير أم لاول مره انو تسمع حجي كل وحده عده جهال بس مو شرط تطبق كل الحجي على طفله لان كل طفل يختلف عن الثاني وحتى حجي الكتب مو دائما يطبق على طفلك

طبعا اني اول يوم جيت للبيت بعد الولاده يعني ليلته جانت احتفالات للصبح معرفت ليش او شنو السبب
طبعا اني حضرت السرير وكل شى تمام بس جانت اول مااحطه بالفراش تبدي تعيط
ابوه كال اكيد اكو شى بالفراش بس ممعقوله الفراش جديد وكل شى ماكو وسبحان الله اول منشيله تسكت اول منحطه تبدي طبعا لحد الصبح اخر شى جبنه الكرسي ماله السيارة وحطيناه بالكرسي ونامت واحنه منعرف السبب :0148:
الصبح جتي الممرضه للبيت شافتني :ghjghj:حجيتله الفلم شطلع :3D_Smilies191:
طلع الخاتونه تريد مكان ضيق لان متعوده بالبطن مكانه جان ضيق وهسه من احطه بالفراش مدتكدر تنام طبعا الحل السريع شجان
جبنه السلة مالة الملابس اللي نحطه بالغساله وحطينه مخده بيه ونامت نومه هنيه واحنه هم وياه :3D_Smilies140:
um maryam
30-12-2007, 01:52 AM
الشغلة الثانية واللي اعتقد انه جانت غلطتي :3D_Smilies137:
انو سمعت حجي الدكتورة كالت تبدين توكليه بعد متكمل ال5 اشهر ولو المعروف انو 4 لو 4 ونص يبدون ويه الجهال بس كالت النظريات الحديثه واني خفت وجانت النتيجه انو :3D_Smilies26:الخاتون هسه اكله ابد موزين يعني لا بيض ولا جبن ولا اي شى يعني الشغلات اللي تاكله كلش قليله
اني براي الجاهل كل ميكبر كل ميكون تذوقه اكثر للشغلات فممكن ميتقبله بس اذا الجاهل بعمر صغير والتذوق ضعيف فممكن يكبر وهو متعود على الاكلة
ام ماهر
30-12-2007, 11:27 PM
موضوع جميل عاشت ايدج ام مريم والله اني بالنسبة الي اول طفل وعمرة 3 اشهر وهسة عايشة وياه
بالتجارب والنصائح واطبق عليه والي اشوفة يرهملة استمر بيه والي يضوج منة اتركة
بسرعةوحاليا احاول انضم النوم مالتة وان شاء الله ابتدا من السنة الجديدة
راح ابدي اطعمة شوية شوية

يالله وينكم ياامهات خلونا نستفاد والكم الاجر والثواب لان احنا بغربة
وما عدنا الي يعلمنا غير اخواتنا الي همة انتم
لوبي
30-12-2007, 11:56 PM
موضوع رائع ويستحق التقييم سلمت يداك ام مريومه
شسولف الكم على تجربتي ولكم اكلت هوا خخخخخخخخخخ
اولادي الكبار اصلا ماحسيت بيهم الله وكيلكم غير بس من طلعو من بطني حسيت بألمهم خخخخخخ وبعدين الوالده الله يحفظها استلمتهم على دكاتره على اكلهم على لبسهم وماسلمتهم اله وهم كل واحد من عدهم ماشاءالله بالمدرسه محمد تسع سنوات ودانيه 5 سنوات وبعدين لحد اخر لحظه بعمان انتظر اقامتي هي ويايه ومو حاسه بمسؤليتهم وكنت مقرره مااسوي اولاد لان خلص الله يحفظهم بس زوجي الله يحفظه اصر وحارب من اجل الانجاب خخخخخخخخخخخخ
بعد وصولي للسويد ب 7 سنوات قررت اسوي اطفال
وماادراكم شصار بيه داده شدو راسكم ياكرعين ولكم مادري منين اتغرب ومنين تشرق خخخخخخخخخخخ
واذا عاطو عطت وياهم واذا بجو بجيت وياهم واذا تمرضو تلكيني يئست من الحياة ولحد ماادبغت بيهم
اني اسوجيت وكمت احجي ويا روحي خخخخخخخخخخ

بس تحسين الطفوله والاموه حلوه ولازم الطفل بدايه ولادته تهتمين بي هوايه وتعتنين بيه
والدكتوره حجانت ويايه خطوه بخطوه
وكمت اطعمهم من 3 اشهر ونص والله مااحلاهم فدوه لعيونهم واحجي واسولف وياهم لان الطفل يفتهم ويخزن الحجي الي تكولي واحممهم جنت يوميا لان الغسل ينشنش الطفل ويربي
والوجبات الحليب اعطيه كل ما احس ان يحتاج اصلا ماانطي بالمواعيد خخخخخخخخ والحمدلله رب العالمين

صرنا اصحاب سوابق اقصد خبرة خخخخخخخخخخخخخخخخخخخخ

والطفل على ماتعودي
لوبي
30-12-2007, 11:58 PM
خخخخخخخخخخخخخخخخخخخخ
ام مريم ضحكتيني على مريومه وهي بسلة الملابس خخخخخخخخخ فدوة لعيونها

قيييم الموضوع
um maryam
31-12-2007, 12:02 AM
هله عيني ام ماهر منوره والله تدرين اللي خلاني اكتب هذا الموضوع هو المعاناة اللي شفته بتربيه مريم واللي لازلت اشوفه :033:
وان شاء الله بهذا الملف نكدر نساعد بعض

اكو شغله القشره اللي يصير بشعر الجهال اني ملعبت بيه لان يكولون لازم متشيليه وهو يوكع من نفسه اني بمريم بقت لحد عمر 8 اشهر ووراه كالت الدكتورة حطيله زيت الزيتون ماله اكل قبل السبح بنص ساعة ووراه غسليه وهي شويه شويه تروح وصدك راحت
um maryam
31-12-2007, 12:14 AM
الشغلة الثانية هي الحول اللي تصير بعيون الجهال
اني اتذكر جانوا يسموه حولة الحسن وتروح بعد السنه بس من سالت طبيب اطفال بالنت كال لا ماكو هيجي شى لازم تنتظرين لحد 6 اشهر اذا مراحت روحي للطبيبه واني صدكت ورحت للطبيبه ماله عيون
كالت لا مابيه شى هي صح سوت فحوصات لعين مريم بس كالت هو الجلد اللي يصير بين العينين وهو الجلد اعلى الخشم ايضا يكون صغير ومشدود فيسوي حول بالعين من يكبر الجاهل هذا الجلد يكبر ويخلي العينين يبتعدون بس اذا ضل معناه احتماليه الحول
والحمد لله راحت
حاليا هاي الشغلات اللي اتذكره واللي عده اي اسئله خلي تسال علمود نتذكر ونجاوبه
um maryam
31-12-2007, 12:27 AM
شكرا لوبي على المرور والمشاركة والتقييم
يله احجيلنه مغامراتج اني يوميه احجيلكم مغامره وصدك التربيه بالغربه صعبه لان شكد ربيت جهال اختي بس من جيت لمريم الشغلة جانت مختلفه جدا حسيت اني مربيت جهال اختي بس اهتميت بيهم لان كله توجيهات الوالده الله يحفظه واني اطبقه بس من جيت اهنايه متدرين شوكت لازم تكعد شوكت تاكل بايده واني كله متاخر مااعرف اي شى :0148:
والبجي اول ايام لاتنحسب شلالات :3D_Smilies188:

يله كل وحده تدخل تكول صارت عده كابه بعد الولاده لو لا اني صارت عندي بس مو كلش قويه لان مريم جتي صغيرة ووزنه قليل ومجانت ترضع زين ووحدي فجنت اكول مااعرف اربيه ايام صعبه وهسه صارت ذكريات :3D_Smilies11:
اصالة الشرق
31-12-2007, 12:28 AM
شلونج ام مريم وشلون مريومه ترى منتظرين ترجعين لموضوعي وتعرفينه على مريم اشوفج رحتي ومارجعتينه


احجيلج شويه على تجاربي ويه اطفالي
اني كل يوم لازم اخصص وقت لجهالي اكعد وياهم واحجي وياهم ويحجولي عن ملاعيبهم او عن افلام الكارتون المفضلة
او شصار عدهم بالمدرسة او الروضة وبالليل احجيلهم قصة ولازم كل يوم العب شويه هم وياهم

اعلمهم ميكذبون ابدا حتى لو يخافون من العقاب لان اعلمهم اذا صدقو وياي بكل شي اني اعفيهم من العقاب بشرط ميتكرر الغلط


بما انه اني عايشه بغربة وماكو مدارس عربية يمي او جامع اني متكفلة بتدريس جهالي اللغة العربية والقران

غير شي ناسية تجاربي لان الزغيره عمرها 3 وعجزت اني
um maryam
31-12-2007, 01:23 AM
اصاله مشكورة على المرور ومنوره عيني وان شاء الله اجي لموضوعك بس ماشاء الله المواضيع كثيرة وماكو وكت
ربنا يحفظلج الجهال يارب بس ياريت تحجيلنا تفاصيل اكثر مثلا شوكت بديتي تقرين قصة النوم الهم بياعمر وشلون القصه طويله لو قصيره وعلى القصه ينامون لو بعده
وشلون بديتي تعلميهم العربيه وبياعمر وشلون متقبلين الشغلة لان تدرين مرات المدارس احسن يكون الطفل منضبط بيه اكثر
وننتظرج مره ثانية :11_2_104[1]:
بديل القمر
31-12-2007, 06:37 AM
والله يام مريم منين ابدي وين اروووح خليه مطموووومه

بس اي استفسار من عيوني اساااعدج واساعد اي وحده

على اساس خبره لله الحمد

بس القشره الي براس الطفل احناااا نسميه قلح وهذا من اول شهر نحط عليه زززيت قبل لا نغسل للطفل بنص ساعه ومااخلص من الاربعين الا والقشره منتهي امرهاااا

عاد اني الزيت ويا تجهيززز الطفل شي ضروروي لان اطفالي اجيبهم جاف جلدهم وبيه قشررر وادهنهم قبل النوم جسمهم ومن يصحون على طول للحمام يطيح القشووور


وبنتج جان بفراشهااااا حطيتي مخده مناااااااااااا ومخده منااااااااااااااااا وسويتيه ضيق مو يام مريم انتووو بطلتو تقمطونه للطفل امهاتناا يقمطونه ويلمون عضامه اني اطفالي يوم جانو صغار يبجون يردون القماط


اني جانو التوم
جانو اذا نامو مايقبلون اي هززه او حركـه تبدي العيطه


وجتني فترههه طويله يجوووز اربع خمس اشهر افرش الارض واحط لكـل واحد فراش على مود بس ينامون بحضني
انزززلهم بالفراش الي بالارض اسحهم سح خخخخخخ وانام ويااااهم خخخخخخخخخخخخ واذا صار الصبح اقوم بس واروح لفراشي


بس بصوره عامه اني مااعودهم على حضني هواااايا يعني حتااا اذا بجااا باليل احاول اهزه بايدي احطهااا تحت راسه واااطلع صوت بس يحس اني هنااا يناام وهذااا الشي قلته لام ماهر بس البنيه مو مصدقه روحهااا صارت ام
شسويلهاااا خخخخخخخخخخ
والحليب بالليل على غير وقته مضر لان الحليب يضل على اللثه ويتعفن والطفل يتعلم يصحااا لان يعرف بي حليب
ومتترتب نومته اذا جان بيااا ممميات بالليل


ومثل ماقلتو اسمعووو حجي امهاااتنااا والقماط ليش بطلتووه لان عاده قديمه
تدرين اني قلت مااريد احجي اشوووو ماسديت حلجي

خخخخخخخخخخخخخخخخخخخخخخخخخخخخخخ
ام فاطمة 2007
31-12-2007, 09:52 AM
والله موضوع يخبل عاشت ايدج ام مريوم

انا هم بغربة وفطوم صغيرة وهسة عمرهة يوم 10-1 راح يصير 4 اشهر طولة العمر الهة ياربي وقررت اوكلهة بس مااعرف شنوانطيهة ياريت خبراتكم انا شفت بالسوك اكو فواكه معلبة مثل التفاح والجزر ولكيت هم اكل للاطفال من عمر 4 الى 24 شهر بيه رز ووياه مخلوط خضروات او عسل او تفاح نوع هينيز او نستل ومااعرف شنو اسوي ياريت خبراتكم

وانا فطوم هسة بس على صدري ابد ماتقلبل تاخذ الممة نهائيا وماعودتهة على حظني مرات اتنام لوحدهة على القنفة وياريت اعرف اشلون انظم نومتهة بس هية هسة الصبح على كعدتي تكعد وباليل رعلى نومتنه اتنام ولو احنه انام متاخرين بس قبلهة هم اتنام بعد روحي بس وكت اللي اريد اغيرلهة الحفاظة قبل لاانام اشو الحلوة تفتح عيونهة وتصحصح انتظر اشوي العب وياها وبعدين تتعب وتنام

بس اريد اعرف هسة شنو الملاعيب اللي تناسب لعمرهة لان هسة انا جاي اشوفهة الماوس مو بي ضوا تنتبه عليه وحتى اللي جوا الماوس مرسوم بيهة كارتون تفقد عليه فياريت اتساعدوني همين

وهي حبيبتي ان شاء الله اذا الله سهل على زوجي عمرهة 10 اشهر ونرجع للعراق والله كريم
لولــــه
31-12-2007, 11:02 AM
ام مريم عاشت ايدج على الموضوع و على طرح الموضوع فعلا حلو و مفيد و ممتع


احجي يلكم تجربتي بس شويه شويه يعني كل ما اتذكر شي اجي احجي
اول شي اني تزوجت عمري 25 سنه و صرت حامل راسا و صار عندي طرح وره شهرين و بعدين نريد يصير حمل ماكو و ضليت اتعالج و اروح طبيبه و اجي طبيبه الى ان الحمدلله و الشكر صارحمل بعد سنتين ضبط من زواجي 2001

الحمدلله جتي هاله مواليده 2002وطبعا رجعت من المستشفى الى بيت اهلي و ضليت بيت اهلي شهرين كلش عاديه الامور صح تصير شغلات بسيطه يعني جتي فتره ما تقبل ترضع من صدري 3 ايام و بعدين من وحده رجعت ترضع بس طبعا امي و خواتي 2 ويايه الله يحفظهم ماخلوني احس بشي ابد

وره شهرين رجعت لبيت عيالي عندي شقه فوك اني و بيتهم كلش بعيد عن اهلي نص ساعه بالسياره يعني قصدي بعد مو بسهوله اروح لبيت اهلي فد كل اسبوع او اسبوعين مره

من اول ليله الي بيتي و هاله ما تقبل تناميمه مو تتنه بالليل بس تبجي و بصريخ ياربي شبيه البنيه من الصبح وديناها طبيب اطفال كال كلشي مابيه و ثاني ليله نفس الشكل و للصبح بس تبجي و تجيني فترات اني ابجي وياها لان صدك مدا اعرف شسويله و مرات من ابوه يشيله شويه تسكت و ترد تبجي و هاي احنه يوميه الليل كله سهره وياها وتنام الصبح بحيث هاي الفتره اني اعتبره اصعب فتره بحياتي و ضلت على هالحال 3 اشهر والله اني و ابوه اتدمرنه هم تعبنه و هم مقهورين عليه مانعرف شبيه زين و ليش من رجعنه من بيت اهلي ليش بيت اهلي جانت البنيه هادئه و لحد الان منعرف ليش هي هيجي بذيج الفتره و طبعا اكثر واحد اتاذه هو ابوه لان جان يسهر لصبح و بعدين عنده دوام الصبح يعني فعلا فتره مؤذيه الحمدلله و الشكر على كل حال


و انتضرو المغامرات القادمه لان عندي هوايه مغامرات ويه فيصل و هاله
لولــــه
31-12-2007, 11:13 AM
ام فاطمه عمري اول شي بالنسبه للاكل نصيحه من عندي ابد لا تستعملين اكل قواطي او معلب لان لازم بي مواد حافظه و هي فدوه لعمره بعده صغيره
لان هسه اكله ماكو اسهل منه تسوي بالبيت مثل شوربة خضار تخلين بيه فد عظمه صغييره
فواكه تسويه عصير او تهرسيه بس مثلا الموز شويه ثكيل لا تنطيه هوايه
اصلا اني هاله 4 اشهر شويه اوكله من اكلنه اذا الاكل مو دهين مثل شوربه عاديه الصبح شويه صفار بيض تبدين ب ملعقه وحده مال استكان ثاني يوم ملعقتين و هكذا لان البيض ماينطي هوايه اول مره

و بالنسبه للالعاب اشتريله خرخاشه و وصواصات هسه بهال عمر تتخبل على هاي الشغلات و اخذيله الوان زاهيه و مثلا اكو هاي الملاعيب الي تمشي مثل فاره تنصبيه و تمشي هاي هم تلفت انتباه و ان شالله اكون ما قصرت و اي سؤال اني حاضره
و اكيد البنات هم لح يفيدوج

ها و بالنسبه للرضاعه اصلا هذا احسن شي انه بس على صدرج ضلي رضعيه لان هي من تبدي تاكل بعد ما تحتاج حليب اكثر من صدرج هو يكون كلش كافي ويه الاكل

و بوساتي الحاره لفطومه الحلوه
ام فاطمة 2007
31-12-2007, 01:55 PM
ام هالة يالغاليه كفيتي ووفيتي وياربي يوم اتقومين بالسلامة وتمام الخلقة يارب

وان شاء الله انا همين راح اسوي مثلج بس البيض اسوي من هذا ابو نص سلك وزين كلتي على الفواكه مااشتريلهة هيج لان انا همين خفت من المعلب اسويلهة انا فواكه مهروسة
ورد الجوري
31-12-2007, 05:43 PM
ام مريم مشكورة


والله دااكتشف نفسي ابني ديعلمني واني دااعلمه عندي حجي واشياء احسه صح واشياء احسه غلط


اول شي فترة حملي جانت متعبة بدون متابعة طبية للشهر السابع وجنت قلقة جدا بس الله يسره وبعد الولادة الحمد لله جان ابني حباب وعاقل ليحد ال 6 اشهر بس صار عنده ابو صفار وبقى 14 يوم وومثلج هم خفت على عيونه كل فترة احسه تكلب على جههة (مرة يمين ومرة شمال كمت اموت من الخوف اكول ليحول الولد )
وراها تغير الوضع


احجي عكب باجر ان شاء الله مااكدر اكمل :3D_Smilies198:
ام علاوي الوكح
02-01-2008, 06:07 PM
اني جيت
بس اقرا الي فات واجي
عندي حجي هواييييييييييييييييييييييييييييي
لان علاوي مشيبني التوام كارثة
راجعة
um maryam
03-01-2008, 08:54 PM
والله يام مريم منين ابدي وين اروووح خليه مطموووومه

بس اي استفسار من عيوني اساااعدج واساعد اي وحده

على اساس خبره لله الحمد

بس القشره الي براس الطفل احناااا نسميه قلح وهذا من اول شهر نحط عليه زززيت قبل لا نغسل للطفل بنص ساعه ومااخلص من الاربعين الا والقشره منتهي امرهاااا

عاد اني الزيت ويا تجهيززز الطفل شي ضروروي لان اطفالي اجيبهم جاف جلدهم وبيه قشررر وادهنهم قبل النوم جسمهم ومن يصحون على طول للحمام يطيح القشووور


وبنتج جان بفراشهااااا حطيتي مخده مناااااااااااا ومخده منااااااااااااااااا وسويتيه ضيق مو يام مريم انتووو بطلتو تقمطونه للطفل امهاتناا يقمطونه ويلمون عضامه اني اطفالي يوم جانو صغار يبجون يردون القماط


اني جانو التوم
جانو اذا نامو مايقبلون اي هززه او حركـه تبدي العيطه


وجتني فترههه طويله يجوووز اربع خمس اشهر افرش الارض واحط لكـل واحد فراش على مود بس ينامون بحضني
انزززلهم بالفراش الي بالارض اسحهم سح خخخخخخ وانام ويااااهم خخخخخخخخخخخخ واذا صار الصبح اقوم بس واروح لفراشي


بس بصوره عامه اني مااعودهم على حضني هواااايا يعني حتااا اذا بجااا باليل احاول اهزه بايدي احطهااا تحت راسه واااطلع صوت بس يحس اني هنااا يناام وهذااا الشي قلته لام ماهر بس البنيه مو مصدقه روحهااا صارت ام
شسويلهاااا خخخخخخخخخخ
والحليب بالليل على غير وقته مضر لان الحليب يضل على اللثه ويتعفن والطفل يتعلم يصحااا لان يعرف بي حليب
ومتترتب نومته اذا جان بيااا ممميات بالليل


ومثل ماقلتو اسمعووو حجي امهاااتنااا والقماط ليش بطلتووه لان عاده قديمه
تدرين اني قلت مااريد احجي اشوووو ماسديت حلجي

خخخخخخخخخخخخخخخخخخخخخخخخخخخخخخ




مشكورة بديل على المرور والمشاركه وانت ماشاء الله خبره واكيد راح نحتاجج دائما فمري علينا دائما
واكيد الج الاجر والثواب ان شاء الله
بالنسبة للقماط اني تدرين بعدين قمطت بنتي ولو مو قماط قوي بالبطانيه شويه قوي وصدك مجانت تنام الا لمه نقمطه وتعرف من نقمطه انو وقت النوم وترتاح كلش بس فتره هم لازم تعوفيه من تكبر لان يبدي الجاهل يتعود وهم تكون اكثر حساسيه يعني اني بنتي جانت اول متخلين الغطه عليه تكعد كلش نومته خفيفه
وبالنسبة للحليب :0148: اني بنتي لحد الان تكعد مرات للحليب مااعرف شسوي
بس هي مدتقبل تشرب الحليب الا بالبطل اتخيل من احوله للكلاص راح تترك الحليب فداانتظر لل2 سنه يله علمود اذا عافته مو مشكلة خاصة انوا لحد الان اسنانه مو طالعه كامل
um maryam
03-01-2008, 09:02 PM
والله موضوع يخبل عاشت ايدج ام مريوم

انا هم بغربة وفطوم صغيرة وهسة عمرهة يوم 10-1 راح يصير 4 اشهر طولة العمر الهة ياربي وقررت اوكلهة بس مااعرف شنوانطيهة ياريت خبراتكم انا شفت بالسوك اكو فواكه معلبة مثل التفاح والجزر ولكيت هم اكل للاطفال من عمر 4 الى 24 شهر بيه رز ووياه مخلوط خضروات او عسل او تفاح نوع هينيز او نستل ومااعرف شنو اسوي ياريت خبراتكم

وانا فطوم هسة بس على صدري ابد ماتقلبل تاخذ الممة نهائيا وماعودتهة على حظني مرات اتنام لوحدهة على القنفة وياريت اعرف اشلون انظم نومتهة بس هية هسة الصبح على كعدتي تكعد وباليل رعلى نومتنه اتنام ولو احنه انام متاخرين بس قبلهة هم اتنام بعد روحي بس وكت اللي اريد اغيرلهة الحفاظة قبل لاانام اشو الحلوة تفتح عيونهة وتصحصح انتظر اشوي العب وياها وبعدين تتعب وتنام

بس اريد اعرف هسة شنو الملاعيب اللي تناسب لعمرهة لان هسة انا جاي اشوفهة الماوس مو بي ضوا تنتبه عليه وحتى اللي جوا الماوس مرسوم بيهة كارتون تفقد عليه فياريت اتساعدوني همين

وهي حبيبتي ان شاء الله اذا الله سهل على زوجي عمرهة 10 اشهر ونرجع للعراق والله كريم


هله عيني ام فطوم منوره انت وفطوم الحلوة
حبي بالنسبة للاكل هسه بس مهروس الفواكه وفوح تمن يعني شويه تمن ويه المي وتنطيه ولتعوديه على اكل البره لان بيه مواد حافظه ونكهات الجاهل من يتعود بعد ميقبل اكلج بس هم مو قصدي لتوكليله ابد خلي تضوجه وتاكل منه لان تنفعج بالطلعات سهله النقل والحفظ وتساعدج هوايه بس يعني لتعتمد عليه يعني شويه من اكلج وشويه من بره علمود هم تسوين نفس الشغلات اللي تشوفيه تعجبه

وبالنسبة للملاعيب اكو لعبه تنحط بالفراش وتفتر وتطلع صوت هاي كلش حلوة للجهال وهم تلهيه علمود تنام واذا ردتي صورته اجيبلج اياه
اي شى يطلع صوت وضوه اشتريله هم اكو شغله مثل البطانيات ان شاء الله احاول اجيبلج صورهم
وبالنسبة للماوس حبي الضوه اللي جوه الماوس هذا اشعاع ديري بالج لتيجي بعينه تره مزين وربنا يحفظه الج يارب
um maryam
03-01-2008, 09:31 PM
ام فاطمه هاي مجموعه شغلات لفطومه الحلوة
http://www.3tt3.net/up4/get-1-2008-hdmxwp8a.jpg (http://www.3tt3.net/up4)

http://www.3tt3.net/up4/get-1-2008-exav1d1k.jpg (http://www.3tt3.net/up4)

http://www.3tt3.net/up4/get-1-2008-usb2ejdt.jpg (http://www.3tt3.net/up4)


http://www.3tt3.net/up4/get-1-2008-jtpgoew6.jpg (http://www.3tt3.net/up4)

http://www.3tt3.net/up4/get-1-2008-ri4n8bym.jpg (http://www.3tt3.net/up4)

http://www.3tt3.net/up4/get-1-2008-99i0mjtg.jpg (http://www.3tt3.net/up4)


http://www.3tt3.net/up4/get-1-2008-c6hrpvk9.jpg (http://www.3tt3.net/up4)


http://www.3tt3.net/up4/get-1-2008-p0pdnmjf.jpg (http://www.3tt3.net/up4)

وهاي كله هسه لعمر فطومه واكبر
um maryam
03-01-2008, 09:34 PM
ام مريم عاشت ايدج على الموضوع و على طرح الموضوع فعلا حلو و مفيد و ممتع


احجي يلكم تجربتي بس شويه شويه يعني كل ما اتذكر شي اجي احجي
اول شي اني تزوجت عمري 25 سنه و صرت حامل راسا و صار عندي طرح وره شهرين و بعدين نريد يصير حمل ماكو و ضليت اتعالج و اروح طبيبه و اجي طبيبه الى ان الحمدلله و الشكر صارحمل بعد سنتين ضبط من زواجي 2001

الحمدلله جتي هاله مواليده 2002وطبعا رجعت من المستشفى الى بيت اهلي و ضليت بيت اهلي شهرين كلش عاديه الامور صح تصير شغلات بسيطه يعني جتي فتره ما تقبل ترضع من صدري 3 ايام و بعدين من وحده رجعت ترضع بس طبعا امي و خواتي 2 ويايه الله يحفظهم ماخلوني احس بشي ابد

وره شهرين رجعت لبيت عيالي عندي شقه فوك اني و بيتهم كلش بعيد عن اهلي نص ساعه بالسياره يعني قصدي بعد مو بسهوله اروح لبيت اهلي فد كل اسبوع او اسبوعين مره

من اول ليله الي بيتي و هاله ما تقبل تناميمه مو تتنه بالليل بس تبجي و بصريخ ياربي شبيه البنيه من الصبح وديناها طبيب اطفال كال كلشي مابيه و ثاني ليله نفس الشكل و للصبح بس تبجي و تجيني فترات اني ابجي وياها لان صدك مدا اعرف شسويله و مرات من ابوه يشيله شويه تسكت و ترد تبجي و هاي احنه يوميه الليل كله سهره وياها وتنام الصبح بحيث هاي الفتره اني اعتبره اصعب فتره بحياتي و ضلت على هالحال 3 اشهر والله اني و ابوه اتدمرنه هم تعبنه و هم مقهورين عليه مانعرف شبيه زين و ليش من رجعنه من بيت اهلي ليش بيت اهلي جانت البنيه هادئه و لحد الان منعرف ليش هي هيجي بذيج الفتره و طبعا اكثر واحد اتاذه هو ابوه لان جان يسهر لصبح و بعدين عنده دوام الصبح يعني فعلا فتره مؤذيه الحمدلله و الشكر على كل حال


و انتضرو المغامرات القادمه لان عندي هوايه مغامرات ويه فيصل و هاله


اخاف هاي مثل بنتي جانت تريد السله لو ماكن ضيق لو يجوز جان عده غازات هم الجهال بهيجي عمر مشكلة خاصة اول طفل ومنتظرين مغامرات فيصل قبل لييجي اخوه ويبدي مغامراته :3D_Smilies198:
um maryam
03-01-2008, 09:45 PM
ام جعوبي وام علاوي منتظرين مشاركاتكم

ام فاطمه بالنسبة للبيض لتستعجلين هسه احجيلج مغامرتي ويه البيض
اني كلولي لتنطين بيض لحد 7 اشهر وبعدين انطي واول مره سويت بيضه ام ال10 دقائق ويكون الصفار سائل وانطيته شويه وعجبته وثاني مره انطيته بيضه كامله وجان ثكيل على معدته وزوعته ومن ذاك اليوم كرهت البيض وصارت متاكله لحد يومنه هذا
فديري بالج شويه شويه والبياض بالبدايه مينطي
لولــــه
04-01-2008, 08:39 PM
هسه نحجي على اول مغامره ويه فيصل افندي
فيصل مواليد 4-11-2004
اب بغداد يعني جانت دنيا شته اول ما رجعت من المستشفى بيت اهلي طبعا و ماكو اي مشكله يرضع من صدري و ينام نوم مو طبيعي بحيث امي تكول يمه صلوات شكد هادئ ابنج بس طبعا كل فتره نبدله الحفاضه جنت استعمل ديسبوسبل من فاين الى ان فديوم بعد اسبوعين دا ابدله الحفاضه جان اشوف دم من مقعده يمه شصار بيه تخبلت ما اعرف شسوي تالي ودينا لطبيب كال هاي انتو شمسوين طلع من نوع بشرته كلش كلش حساسه ما تتحمل حفاضه وره حفاضه كال صاير بالمقعد مالتع قرحه من وره الفطريات ماكلته اكل ل طي زه حبيبي


كتله ليش دكتور اني اخليله دهن زنك قبل ما احفظه كلي ميفيد جلده كلش حساس
وكلي اولا بعد ماكو حفاضه تلزم جلده نهائيا
ولا اي نوع نايلون حتى اذا وصل قطنيه وحده من غير نايلون زين شلون مو هاي بوله وحده و تبلل الاول و التالي كلي اي هاهيه تستحملين و لازم يبقى مكشف 12 ساعه من ال 24 ساعه
خربت من الضحك كتله يعني نص اليوم مكشف كلي اي كال والا يصير بي تسمم بالدم اسمالله علي

وبدت معاناتي فرشتلي بالهول ويا انام وحدنه و صوبه 24 ساعه ماتنطفي لان خطيه بارده و هو لازم مكشف والليل كله اني بالفزه كل مايبول ابدل اوصل
طبعا كلي وصل قطنيه لاغير خطيه نزلت امي لسهام العبيدي بوكته و اشترت طول كامل و كصكصته و خيطته و تجيبلي وجبه و تغسل وجبه اي والله كله امي و خواتي لو مو همه جان كلش صعبه و ضليت على هاي الحاله لمدة 3 اشهر كامله يله التئمت الجروح و خف الاحمرار بالمنطقه
بس هذا حجي اكيد غير الشوف

الحمدلله والشكر هسه يروح ويه ابو للجامع من اتذكر والله اضحك
ورد الجوري
05-01-2008, 02:49 AM
لوله الله يساعدج يعني فعلا دمار هم زين جنتي يم اهلج


اني ابني انطيت اول مرة بيض بعد السنة بكم يوم طبعا اني امشي على حجيهم لان يكولون البيض مضر للطفل قبل السنة

انطتيها سلق بس سلق جدا يعني كولش مستوية مو كولش اكل ولليوم مو كولش يحب البيض يعني هم صح لو غلط ماادري

يعقوب عصبي ومن يعصب يريد ياكول الكدامة يفتح حلكة :3D_Smilies230:
طبعا الى عمره سنة واكثر من شهر ينام بوحدة هسه ميقبل ينام اله يمي ولازم ايدي ومرات راسه على وجهي دااعاني مدااعرف ليش وشنو السبب بصراحة ينام اول نومته بوحدة فد ساعتين او ثلاثة وبعدين يكعد يبجي ويجي يمي

ميحجي طبعا كولش قليل وعنده فد فقرة العفو يزوع من ضايج او زعلان مدمرني خاصتا من يشوفني مثلا ضايجة او شي او صرت عصبية يزوع


يحب يطلع وصاير ميريد يكعد بالعربانة يريد يمشي وبكيفة يعني اذا دنمشي يمين يريد يروح شمال

اكمل غير وقت ان شاء الله
um maryam
06-01-2008, 10:07 PM
ام هاله الله يساعدج صدك صعبه هذا امر من الطهور والله ستر انج يم اهلج وديساعدوج يله من يكبر ذكريه بيه حبيبي الله يحفظه ويقومج بالسلامه يارب
um maryam
06-01-2008, 10:27 PM
لوله الله يساعدج يعني فعلا دمار هم زين جنتي يم اهلج


اني ابني انطيت اول مرة بيض بعد السنة بكم يوم طبعا اني امشي على حجيهم لان يكولون البيض مضر للطفل قبل السنة

انطتيها سلق بس سلق جدا يعني كولش مستوية مو كولش اكل ولليوم مو كولش يحب البيض يعني هم صح لو غلط ماادري

يعقوب عصبي ومن يعصب يريد ياكول الكدامة يفتح حلكة :3D_Smilies230:
طبعا الى عمره سنة واكثر من شهر ينام بوحدة هسه ميقبل ينام اله يمي ولازم ايدي ومرات راسه على وجهي دااعاني مدااعرف ليش وشنو السبب بصراحة ينام اول نومته بوحدة فد ساعتين او ثلاثة وبعدين يكعد يبجي ويجي يمي

ميحجي طبعا كولش قليل وعنده فد فقرة العفو يزوع من ضايج او زعلان مدمرني خاصتا من يشوفني مثلا ضايجة او شي او صرت عصبية يزوع


يحب يطلع وصاير ميريد يكعد بالعربانة يريد يمشي وبكيفة يعني اذا دنمشي يمين يريد يروح شمال

اكمل غير وقت ان شاء الله






هله بيعقوبي الحلو
تدرين اني كلولي اهنايه قبل السنه يعني على 7 اشهر تكدرين تنطين البيض بس اني بنتي لحد الان تكره فده شى اسمه بيض بكل انواعه حتى بالمخلمه هم متاكله لان بيه بيض واحس الطفل ككل ماهو صغير يتعود اسرع لان ميحس بالطعم وممكن يتعود اسرع كل مايكبر تصير الشغلة اصعب ويبدي مياكل الاكل الا اللي يعجبه
وبالنسبة للعصبيه هاي يم كل الجهال اني من تتعصب تبدي تذب الاكل

بالنسبة للنوم تدرين الجاهل كل مايكبر كل مااحساسه يكبر وياه يعني يبدي يخاف ويخجل اني مريم من جانت صغيره تروح بحضن اغلب الناس بس هسه من كبرت تشوف الناس متبجي بس لحضنهم متروح هم وانت اكيد ديخاف حبيبي حاولي لتخلين الغرفه ظلمه كلش ومرات تره الجاهل ممكن ديشوف صورة فده شى بالغرفه وديخاف اني مرات انام ويه مريم بس اني بفراشى وهي بفراشه يعني بس تعرف اني موجوده بالغرفه

بالنسبة للزواع حاله غريبه يعني هو يخلي ايده بحلكه ويزوع نفسه لو شلون
اني مريم من جانت صغيره جانت تذب الاكل من حلكه اذا دتاكله لاول مره لو شبعت يعني اي اكله لاول مره تذبه بعدين اذا عجبه تاكله اذا لا متاكله
ومرات هم جانت مخبلتني تذب الاكل بالصدريه وبعدين تاكله ولحد الان مرات من انطيه شى بايده تحب تذبه على الارض وبعدين تاكله يعني تعقمه وبعدين
وبالنسبة للمشى اني هم متقبل تكعد بالعربانه وتريد تمشى وبمزاجه واذا جريتيه تكلب الدنيا لو تبجي لو تكعد بالكاع
يله خلي نشوف ابداعات يعقوب بعد
ام فاطمة 2007
07-01-2008, 09:32 AM
مشكورة حبي ام مريومة وفطومة عدهة من هاي اللعبة اللي بالجرباية تنحط وهم تصفن عليهة واتحبهة


وانا صديقتي كللتلي بس اتكمل 4 اشهر انطيهة بيض مسلومك نص سلك حتى لو بطرف خاشوكة الصغيرة بس تتعلم على طعمة وانشوف
um maryam
07-01-2008, 09:23 PM
هله عيني ام فاطمه اي هذا الموبايل اللي ينحط بالفراش كلش حلو وصدك الجاهل يلتهي بيه
وبالنسلة للبيض ضوكيه بس لتكثرين لان تدرين الفار يكون ثكيل على المعده لان بيه حديد
وبوساتي لفطومه الحلوة
ورد الجوري
11-01-2008, 04:40 PM
هلو اجيت راح احجيلكم تجربتي مع الاكل

اخر شي تعلمته هسه انوا استعمل المواعين البلاستك او الي تصير بلاستك وتلزك بالميز وملعقة بلاستك وانطي لابني واخلي كمية كولش قليلة طبعا هاي راح تروح بالخسائر وتصير للعب مع الاسف
وبماعون اخر عادي اخلي اكل الكمية المفترض الي ياكله الطفل

طبعا انت لبسي الصدية وحوالي تحجين ويا
بصراحة شفت اكو نتيجة هو يلعب اني اوكلة واثنينه ناخذ النتيجة المرجوة

هاي الظهر ع الغدا

الصبح انطي بايدي لان يكون بعده مصحصح زين

وبالليل نفس العلمية مال ظهر


اكو معلومة الطفل المفروض اول ميكعد من النوم ياكول واني اسوي هيج حتى بعد ميكعد الظهر راس بعده النوم بعيونة انطي اكل وهذا الحل الوحيد

بالمناسبة ابني يوكف وياكل يعني معاناة الكرسي شلت منه الميز وقربتة من ميز الهول وابد شكد حاولت يكعود وياكل ماكو فايدة رضيت بالامر الواقع


هاي الاكل


انطي كولشي بس الي ميحبة راسا يذبة من حلكة وتعلمت اذوقة يعني انطي قليل جدا جدا بس للتذوق اذا بلعة يعني حبه اذا لا بعد ماانطي
um maryam
11-01-2008, 09:11 PM
هله بام جعوبي وصدك مشكلة الاكل مشكلة
اني طريقتي بالاكل ويه مريم ممكن تكون صحيحه وممكن خاطئه بس مرات هو الطفل يفرض الطريقه والام تسوي اي طريقة على امل انو الجاهل ياكل
الصبح متاكل من تكعد يعني تحتاج فترة تصحصح يله واعتقد الشغلة ماخذته مني :3D_Smilies198:
الغده لا من نكعد من النوم نتغده بس على التلفزيون يعني هي تتفرج واني اخلي بحلكه هي شغلة زينه بس مرات من اطلع او اسافر متاكل لان ماكو تلفزيون وماكو برامجه بس بالبيت مرتاحه كلش
والعشه هم نفس الشى
والاكل هي تاكل بكرسيه بس مرات احسه متاكل زين لان بعدين وره شويه احسه جوعانه لو من ناكل تجي يمنه وتريد تاكل والاكلات الجانبيه هم تاكله وهي تتحرك
واتمنى اوكله ويانه بس جربت جم مره شفت متاكل زين واكلي هم يبرد وكله هوسه وصياح فاحسن شى انو هي تاكل اولا بعدين اني
ام عائشة
18-04-2008, 02:23 AM
السلام عليكم
طبعا اني عيوشة اول طفلة الي الحمد للة نوعا ما كانت متعبة بس اني اعاني انو هية خطية جلدها كلش حساس على طول يصير احمر مع العلم اني على طول الاحضها وما اخليها وسخة خطية مرات واللة حتى يطلع دم منها هلكد ما تتاذى بس راسا اخذ احتياطاتي وابدللها كل ساعة والبسها حفاضات بامبرز كلش زينة للبشرة الحساسة
والحمد للة بس شنو طبعها كلش عصبية والي تريدة تسوي شسوي:0148:


راح احجيلكم تجربة اختي خطية اجاها ابن وعمرة 5 اشهر وصار بية خطية تحسس من الحليب كل دقيقة واللة كل دقيقة تطلع بطنة نقطة وتبدلة كلولها لازم تنطية حليب طبي والطفل يبجي ميريد الممية واختي كلشششششششششش حنونة وضلت تنطية حليب طبيعي وبطنة تطلع تصورو حال اختي واللة العظيم وما كو اختلاف بحجيي شهرين هية دوام علمغسل بلبيت تصورو كلشي متسوي بس تغير الحفاضة وبعدما عانت الي عانت تصورو كلشي بلبيت تغير من ورا مرض الطفل ما خلت تحليل ماسوت كالو لازم تنطية حليب طبي ويطيب بعد شهرين وهية ما انطتة الحليب ضلت علطبيعي وبعد شهرين طاب الطفل يعني استنتجت اختي انو الجرثومة الي تسبب التحسس من الحليب شهرين وتروح اني كتبت قصة اختي قصدي منها انو لاسامح اللة الي يصير بطفلها هيجي شي لاتخاف شهرين وتروح من حالها بدون ماتركة للطفل صدرها هوا نحن نكول شهرين بس الي يعيشها اللة يساعدة
um maryam
18-04-2008, 11:56 AM
تسلمين ام عائشه على قصه اختج والله يساعده صدك صعبه بس اكيد حليب الام بيه فوائد هوايه ومهمة

وبالنسبة لعائشه حاولي دائما تديرين بالج عليه لان كل متكبر احتمال يزيد التحسس عده
تدرين اني بنتي قبل فترة صاره عده تحسس من مستحضرات الجونسن وسمعت هوايه جهال ديصير عدهم هذا التحسس
طبعا بالبدايه مجنت اعرف وجنت كل مااسبحه ونطلع من الحمام هاي اشوفه تحك راسه وجسمه واكول اشو هاي دتحرك وره الحمام بعد متنظفت ههههههههه
وبعدين فده يوم شفت ركبته من وره خطيه من الحك كله احمر وطالع شويه دم من الحك فعرفت وكمت بدلتله اياه
واحنه اهنايه من البرد دائما البشره تكون جافه
يله الله يعينه هاي حجيتلكم على الجونسن علمود تديرون بالكم صح هي ماله اطفال بس مرات الطفل ديصير تحسس من عنده وهاي مو بس بنتي سمعت من هوايه ناس نفس الشى بجهالهم
ورد الجوري
19-04-2008, 09:57 AM
هلو
طبعا اريد اوضح شي حقيقتا شغلة الجونس خوفتني
اني جنت استعمل مستحضر اسمه بوبشن كولش زين وريحتة روعة ويبقى بالجسم فترة طويلة ايام 3 ايام وتبقى الريحة قبل حوالي شهرين استبدلته بجونسن ويارت مغيرته بس اخلي بحمام يبجي يضوج من ريحته بعطر البابونك ويتحسس من عندة وفعلا يطلع يحك
فمثل مكلتي ام مريم الجونسن الظاهر بي شي غلط

ام عائشة
فعلا حليب الام لا يعوض وحمد لله على سلامة ابن اختج

هاي تجربتي مع الجونس وشكلي راح ارجع للبوبشن احسن وافضل على الاقل المنتج هذا مراقب هنا
البعيدة
19-04-2008, 03:47 PM
حبيباتي شلونكم اني عندي مغامرات ولا مغامرات فلونه بزمانها مثلا شغلةالحول صحيح صارت بحمودي وبعد اول واحد وعدكم الحساب وين مااروح يا هاي ابنج ترى احول تدرين لو لا والدكتوره كالت بعد السنه تروح من وحدها لانه اعصاب جسمه بعدها مو بالقوة الكافبه وشيجيب السنه وخلصت والحمدلله :sfsfsf:بعدها الاخ تأخر بالمشي لحد السنه وشهرين ويااا لسا ابنج مايمشي خطيه اكول اخاف عنده ؟؟؟؟؟؟وكل وحده تنطي راي طبي وعلمي حسب نظريه سيد قشطه واني ساكته واكول استعنت بالله كولو مشى حمودي جتني ننوشه وكانت ناعمه والصراحه اني ناعمه يعني موذيج الجندله وعلى ابو ياههاي شبيها بتج خاف حليبج مايشبعها الاخت ظلت تتقيا لحدالسته اشهر وهذا حال سابقها ولاحقها يعني التلاثه يتقيؤن لحدعمر السته اشهروكبرت ننوشه وطلع الشيب من عيوني واكمل بعدين على هدهد
om danial
20-04-2008, 12:53 PM
السلام عليكم
عاشت ايدج ام مريم عالموضوع الجميل ويستاهل احلى تقييم
شلونكم خواتي
حبيت اشارك وياكم بخبرتي ويا اطفالي
للاسف امي مرة جبيره واني اخر العنقود فما استفدت منها هوايه بس خواتي الاكبر مني فادني بها المجال
المشكله اني اتعب هوايه بحملي واقضيه مريضة بس الحمد لله على كل حال
ومشكلتي الكبرى ويا اطفالي انهم انعكاس لشخصيتي فاذا ضايجه يضوجون واذا متكئبه يتكئبون وخصوصا ابني الكبير كلش حساس
الي رجعة ان شاء الله واكمل وياكم مرة الجايه
ام امين
12-06-2008, 03:06 AM
عاشت ايدج ام مريم على هالموضوع
اني عندي 3 يعني عندي كومة كلام
ان شاء الله ارجع على هالموضوع الي شدني وحابة اشارك بيه ان شاء الله

راجعه باذن الله
ام امين
15-06-2008, 11:00 PM
السلام عليكم ام مريم

موضوع شيق وان شاء الله كل الامهات الجدد يستفادون منه

اولا
بالنسبة الي كان اموني هو اول تجربة فهو كان حقل التجارب
بديت مع امين كنت ارضعه واغيرله ومرات يبجي
كالتلي بوقتها الدكتورة اذا شبعان ومتريعتله ومغيرتله يعني نضيف اتركيه بفراشه حتى لو كان يبكي ادخلي عليه بعد 10 دقائق طبطبيله واتركيه وكل شوية زيدي عليه المدة اي باعدي بين المدة والاخرى الا ان يستسلم ويسكت بس المهم مو من اول ميبجي تركضين عليه وتشيليه لان هذا راح يعلمه على الشيل والله سويتها مرتين ونجحت كام يسكت ويلعب بفراشه مثل الملاك
نجي للاكل
بديت مع امين من كان عمره 4 اشهر بالاكل وياريتني مابديت ضليت متعذبة وياه كنت افتح حلكه بالغصب واوكله
بعدها كلت لا بايوب كنت اسال الطبيب وكنت خايفه لتنعاد نفس المأساه مال الاكل كالي انتضري لان المفروض تعرفي استعداد الطفل للاكل من يكوم هو ياشر بايده يريد ياكل يعني من يشوفكم تاكلون يبدي ياشر او يزعجكم هذا دليل على انه مستعد ياكل والحمد لله جربتها ونجحت مع ايوب ومريم انتضرت الى ان همة طلبوا هذا
بالنسبة الي تعلمت من اكول عقاب يعني عقاب مااتراجع لو شومنو يصير لان يتعلمون الكلمه مال الاباء متصير اثنين لو شيسوون

ايضا التصرف الي يسووه اول مرة مااعاقب عليه يعين مثلا اجه وخربط فد شيء بالبيت مااجي اكوله من اول مرة ليش لان هذا راح ينبها عليه وممكن يعيده مرة اخرى (طبعا مو الان من همة صغار) بس اذا عادوه مرة ثانية لا يكون التصرف غير
من ضمن الاشياء الي تعلمتها من دراستي لتربيه الطفل

من اريد احجي وياه انزل لمستوى طوله واتكلم معاه كلام مو صراخ لكن حاد ووجهي يكون جدي دلاله على الزعل واكلمه واحط عيني بعينه

بعدها اني استخدم التايم اوت اولادي يكرهوه لان يضوجون منه
اهم شيء عندي مو على الطالعه والنازله اصيح واصرخ او اعاقب كلشي بوقته حلو


طبعا بالنسبة للدايبر اعلمهم اياه مرة وحده يعني مرة وحدة انزعهم اياه من همة صغار سنتين او سنتين وشوية بس بالبداية البسهم ورة مينامون بالليل دايبر وانزعهم اياه قبل ميكعدون واكولللهم شوفوا شلون انتوا نظاف لا ماكو ببي (ادرار) اعطيهم الثقة اول ووراها اشيله بس المهم ميحسون انهم لابسين الدايبر ووراها همة ياقلمون نفسهم انه ماكو دايبر بالليل

طبعا بالنهار اول ثلاثة ايام مااطلع من البيت لان كل 10 دقائق اخذهم للحمام حتى لو همة ميريدون لان هنا كاربت واخاف لتصير اي شغله ويتوصخ واحنه نصلي على الكاربت


طبعا بالنسبة لل رضاعه ايضا اول خطوة اعلمهم على الكلاص مال البيبيات وبعدها اعلمهم يشربون بيه الحليب وقريب من السنتين ابطل اعطيهم ممة
طبعا اني اولادي كلهم قبل ميخلصون السنة اعلمهم انه يشربون ممة بالليل مرة وحدة ووره السنة ابد ميكعدون بالليل خلص يتعشون ووراها يرضعون وينامون
ف تسهل عمليه فطامهم من الممة

بالنسبة للنوم لازم يتعودون ينامون من وقت ماعندي اي واحد من الاولاد يبقى سهران وره ال 9 بالليل
حتى مريم البيبي 8 او 8 ونص خلص نايمين
طبعا يكعدون من وقت بس بالنسبة الي ميخالف لان اني اداوم وحتى بالعطله عادي اكعد من وقت
ف النوم لازم نظام من همة اطفال بيبي ابد ماعندي مشكله سهر بالليل ونوم بالنهار

هذه بالنسبة من جانوا صغار وان شاء الله اكتبلج في المره الجايه عليهم هسة لان لازم اكوم اسويلهم اكل
صديقة الفاو
06-09-2008, 11:53 PM
:033:بسم الله الرحمن الرحيم والله كنت حايرة شلون راح اقضي الليلة والنت مقطوع وما اقدر اكلم الاهل بالعراق الحبيب بس من شفت هذا الموضوع المطروح عجبني وحبيت اشارك فية (( انا ام لثلاث بنات وولد اهو زغير البزرة )) ما احس عندي مشكلة بتربيتهم بس اتمنى ان احصل على شوية معلومات عن شلون اعامل بنيتي الكبيرة وهي على وجه دخول مرحلة المراهقة وما ادري هل الوضع راح يتغير لو ظل العلاقة بيني وبينه مثل ما اهي الان وبالنسبة للتربية احس ان الي عايش بالغربة تكون علاقة اكثر ارتباط بالاولاد لان ما عندة غيرهم يتبادل مع الحديث اهم يكونون اقرب الناس اله هذا على الاقل الي اشوفة انا بعلاقتي مع عيالي وخاصة وهن بنات احس انهن بناتي واخواتي وامي وكلشي بالدنيا الله يحفظهن وسلمهن وجميع اولاد المسلمين:sfsfsf:
hiba laith
27-09-2008, 04:56 PM
شكرا على مشاركاتكم جميعا .اني دا ادرس هذه المواضيع لان الطفل جاي بالطريق
نونــــــــي
27-09-2008, 05:19 PM
مرحبا يا حلوات

الموضوع رائع و مفيد نفس الوقت لان اكو شغلات متشركة صارت بيناتنا و حالات متشابهة باطفالنا
اني تجربتي وية بنتي هي اول طفل و عمرها راح يصير قريبا سنتين ..مشكلتي وياها الاكل , ما تاكل هواية و شكد ما احاول اقدملها وجبات باشكال حلوة و فيكات تعرف شنو محتوياتها و ما تقبل تاكلها دمرتني ..
و هو طبعا غلطة صارت و سمعت كلام الدكتورة كالت لا توكليها لبن و بيض بعدها صغيرة
و ليهسة ما تقبل تاكل بيض يعني لحد الان ما ماكلة بيضة وحدة ابد ......!!!

و بس الدكتورة هنا مالتها تنطي نصائح كلش حلوة و من اطبقها بالفعل تنجح بس اكو شغلة هي انه الام ما تستسلم لبجي الاطفال هذا البجي يكون مجرد خدعة يقوم بي الطفل لان يكون متعود على نظام و يريد يمشي حسب ما يريد

يعني من كبرت بنتي بعد السنة قررنا انه تنام بغرفتها لوحدها ... تعالو شوفوا البجي ........
المهم كالت الدكتورة لا تسمعين هذا البجي و تحملي اعرف هاي صعبة على الام تشوف طفلها يبجي ..بس تحملي هذا لمصلحته و لشخصيته من يكبر .. صدكوني بيومين تلاثة تعلمت تنام بغرفتها لوحدها ...و هسة اوديها لغرفتها و تاخذ دبدوبتها و تنطيني بوسة الي و بوسة لبابا و تنام بكل هدؤ



بأختصار

خليج مسيطرة على الطفل .. لاتخلين هو يسيطر عليج كوني انتي الاقوى و قرري انتي مو هو ... هاي النصيحة الي اخذتها من الدكتورة و دا اطبقها و فعلا ناجحة مية بالمية


واتمنى الصحة والسلامة لكل طفل
ودمتم بحفظ الله

نوني
بديل القمر
04-05-2009, 06:24 PM
الموضوع حلووووو ومفيد ونعتبرهااا مثل الدردشششششه فشفته مغبرر اخذته ونضفته وهساااا صاحبه الموضوع الله رزقهاا بطفل ثاني نريد تجي تحجيلناااا عن الابداااااااااع
hala
13-07-2010, 01:44 AM
هلو ام مريوم موضوع رائع يسلموااااااااااااا الايادي
اني تجربتي ابنتي هسه عمرها يصير خمس سنين واني جديده بالسويد اول ما اجتي بكي متواصل مجنت اعرف اشربها حليب :217: بس بعدين شويه شويه تعلمت واهنا يكولون على كوله البنات لا جبن لا لبن لا بيض هيج ما جنت انطيها لان جنت اخاف بس هسه لا تاكل يعني مو شرط تاخذه للكبر
والنوم مالتها كان اكبر غلطاتي مجانت تنام بالسرير مالتها وعمرها ما دشنته بس افرشلها بالارض هوايه جانت مرتاحه تنام عليه
وبالنسبه للقشر فاكو زيت ينطونا من نروح لمركز الاطفال استعمله وبصراحه ما اتذكر شوكت راح خخخخ
وقبل ما افطمها يعني كملت سنتين ظبط شكد جنت اسمع ناس يكولون الفطام صعب وديري بالج تتعقد وما تكدرين ويطول اسبوع كله هذا حجي بلا بلا بلا اني بنتي هلكد جانت تحب ترضع جنت اكول مثلها ماكو بعد جاهل هيجي يحب حليب وجنت اتخيل فطامها صعببببببببب
تتخيلون بيومين فطمتها بشويه صبر هذي الماده السوده المره وخليتها ولعبت نفسها وكامت تشرب الحليب العادي بالكلاص
والمرحله مال الروضه اول اشهر جنت اعوفها بالعياط والبجي بس من جنت اكعد اهناك جنت اهملها فجانت تتطمئن بمجرد ان تشوفني كاعده اهناك وشويه شويه تعلمت







بنات ارجوكم ارجوكم اتبعي حدسك مو كل النصائح صح وموكل كلام لان جبيره ولان عدها اطفال يعني خبره ترى كل طفل واسلوبه وفكره ويختلف من طفل لاخر
تحياتي :br:
hala
13-07-2010, 01:50 AM
وهسه صار عندي ولد وهسه هو سته اشهر بالبدايه من جبته اوكي لان عندي خبره وما جنت متوتره لان كل شي جان ريلاكس بس مشكلتي جانت نفس الي قبلها اتعلم ينام بصفي وهذا حال كل طفل يحب ينام على ريحه امه بس اني جان مو طبيعي
ومشكله الاكل هيج هيج ما ياكل حتى السريلاك الي اول جنت انطيهياه هسه ساد حلكه بسحاب اصلا ما ياكله وما اعرف شنو اسويه بس احاول اعلمه شويه شويه اخليه يضوك كل شي ما اخاف بس يرادله شويه صبر وطوله بال
ضوء النجوم
13-07-2010, 02:01 PM
طبعا كل ام عانت بصعوبة باول طفل يعني اني اول ماولدت ابني من يبجي بالليل ويكعد اظل ابجي وياة ومااعرف شسوي لان احب النوم بس بعدين شوية شوية تعودت على هذا الشي وصار عادي وخاصة من يتمرض احسهة ايام صعبة كولش يعني هذا ازيد شي عانيت منة بس الحمد لله والشكر لله
اتجاوزناها وصار عادي بس الله اليستر بالطفل الثاني ههههه
دلوعه حبيبي
19-09-2010, 09:19 AM
هلو بلامهات شلونكم والله عاشت ايدكم على هلتجمع الحلو هم نستفيد من لتجارب ونفيد الامهات الجدد اني يويو حبيب كلبي بلبدايه تعبني كلشششششششششششششششششش لان طريقتي جانت غلط الي هي اول شي علمته على الهز من ينام واله بحظني واله كماط هسه ياله عاف لكماط من دخل 7 اشهر هسه عمره 7 اشهر ونص العمر كله حبيبي

ومعلمته على لممه همتلها يعني اطلعله من صدري بلملاطه واخليه بلممه هم مقبل لان اتعود على لرضاعه لطبيعيه

هي هاي مشاكلي وياه واتعس شي يكعد بليل هوايه من عاف لكماط وبصعوبه ينام اووويلي متت والله