تصويت . مسابقة الشعر الشعبي .

[عيون عليا]

http://www7.0zz0.com/2008/10/28/15/400694457.jpg



اذا كان صباح فصباح الحب والياسمين
واذا كان مساء فمساء المسك والجمال
للارق واجمل العضوات
موعدنا يتجدد مع مسابقة الشعر الشعبي
ومع قصائد الجميلة والرقيقة من عضوات يمتازن بالذوق
حبيباتي العضوات التصويت غير مرئي
http://www7.0zz0.com/2008/10/28/15/451754108.jpg


لعيونكم
لعيونكم ..
اشتاگ وأسأل
دوم انتو اشلونكم
ولعيونكم ..
ذوبت عمري المايعيش ابدونكم
ولعيونكم ..
رخصت دمعي الچان غالي
ورخص بس لعيونكم
تمنيت لو عندي جنح
ياخذني ويه الريح
ويوصلني يم ادروبكم
وتمنيت .. لو عندي گلب ..
يتحمل ليومين
من ماشوفكم
ولعيونكم ..
ذبلت اشفافي
من العطش ،
منتظره زخت مطر
من اتبوسكم
اشگد وحشه ايام الگضت
من دونكم ؟؟
غربة .. ومتاهات .. وألم ..
وگلوب صلفه ..
وابد ماتوصل لربع اگلوبكم
يا أهلي تعبني الحنين
وتغفه ايامي اعله طاري اجفونكم
بالغربة وي روحي
وادور .. بلكي بالصدفة
العيون اتشوفكم ..
اي وينكم ..
عفتوني وحدي
واني ادور وينكم ؟؟
بالغربة شفت اوجوه
من تضحك چذب
واتذكرت كل بسمه
چانت غافيه اعله
اوجوهكم
ولعيونكم .. ابعث تحياتي
بجنح كل طير
حط يم بوبكم
ولعيونكم .. لعيونكم
اتروح فدوه الدنيا
كلها لرمشه من عيونكم
http://www7.0zz0.com/2008/10/28/15/906614613.jpg


على سطوح الفرح فرش الهم جنحانه
وكبل بسمه عيوني وكتل خوانه
وبسيفه الوصخ طعن اجمل انسانه
والجرح صار بكلبي من يضمد احزانه
عراقي اليوم ينزف وبغداد تناشد
اخوانه
وين اهل الغيرة والنخوة
معقوله يتخلى الكلب عن شريانه
عراقي طير مجروح كسرتوا انتو جنحانه
يركص من الجرح مذبوح
وتشوفه الناس بطرانه
اليسأل على النفط وين واليدور على عنوانه
ونسوا يسالون على طفل من القهر غصت احزانه
ومحد دور على شرف عراقيه اغتصبها الضيم واعوانه
وهنا صورة ام سود وجهها الحزن
بحيل تصيح ابني وين عنوانه
والجثث تملي الشوارع دم يغطي الصخر والصخر يندب احزانه
وصرخه موت من بعيد
اخ مات بطلقه اخوانه
والناس تتفرج وهي حيرانه
مو عيب على اللي مات ولا على اخوانه
عيب على الضمير المات يبلع الموس و يكص لسانه

بقلم الخاص للعضوة المشاركة
http://www7.0zz0.com/2008/10/28/15/279260191.jpg


*افــتــح عـيونــك حــبــيــبــي*
اليوم أكسّر سجن صوتي
كافي سكته حروفي تعبهه الحبس...
أفتح عيونك حبيبي
الليل والدمعه انتهن
والظلمه شربتهه الشمس.....
خل اسولفلك سوالف تلعب عله جروح امس
يابو سكته مسودنه طشّر سكتّك
ويابوضحكه مسودنه طشّر ضحكتك....

وبسّمرعيونك عله عيوني وصفنتي
تغيّم شفافك سنه وتمطر عسل
وشگگ أوراق الحزن
مليت أريد أكتب غزل.....

يابو طول الجبل دحظني تعال
انه تعبني العشگ وشلون اجيك...
ويابو خدين الرطب مشتهيه روحي
وتدري بيه
حته لوحنظل شفافك مشتهيك...

يابو گلب النخل ذوبني السكوت
وصرخة عيونك دواي.........
وديرم شفافك صفنتي
وباب عينك مستحاي............

بعد تيهني أعله بختك
ذبني مرود كحل يم عيون هورك.
وشوفني بخط الكحل...

وصوغني لبغداد ترچيه وحجل
وهدني طير بآخر جبال العشگ
لهفان أجيك
أعرف النخلات كلهن
وأندل عيونك حبيبي
وأشرب الدنيه بضحكتك
واندل شراسم إله الثلج من دنيه برگبتك...

وكلشي أندل
كلشي أندل

مو هذاك آنه العرفته تگله مد أيدك عليه يگلك اخجل...

جيت عاشگ من صدگ بس بيه نار
نار تفتح باب لعيون اليتامه
وترسم لكل دمعه دار....
افرشلي خلگگ خل أنام بحضن عينك ياعراق
وخل اسولفلك قضيتي
منين اجيتك....
جيتك ءمن المستحه ءمن الهور من طرف الگصب..
جيتك ءمن البرحي من روس النخل...
ءمن الجبال التشرب غيوم التعب
ءمن التلال ءمن الصحاري ءمن السراب
ءمن الملح وءمن التراب
وجيت اگلك
تدري بيه شگد احبك ياعراق
والله مدري شلون أوصفه
أكبر من الدنيه كلهه
بكبر چلمة ياعراق
بكبر چلمة ياعراق
http://www7.0zz0.com/2008/10/28/15/384040509.jpg


إللي إمضيٌع ذهب


بسوك الذهب يلكًاه


بالغربه شِفتْ التَعب وإتعلٌمت معناه


وإتعلٌمت عالسهر .. والسكته .. والصفناه
ذليت ذلْ النهر من ينكَطع مجراه


وإعرفت كل شي إعرفت


حتىٌ النخل ينحني، لريح السفر من يجي


وجايب غريب إوياه


ألله !! يا هالوطن شمسٌوي بيٌه ألله


نيرانه مثل الثلج


كلما تدكَ عالضلع


أبرد وكَول إشاه


إللٌي إمضيٌع ذهب!!بسوكَ الذهب يلكَــــــاه


وإللي مفاركَ محب ...يمكن سنه وينســــــاه.


. والطاح منٌه الكَلب ، كًلب إصطناعي انلكَه


ويشكٌلونه إهنـــاه..؟ ؟ ؟


بس إل مضيٌع وطــــــــــــــن


وين الوطن يلكَـــــــاه ؟ ؟ ؟



******


آه ياوطن ، يا خبز ، يالشارتك تكتل!!


آه يا وطن ، يا طفل ..


هِنياله منْ صاغ إلك نبض الكَلب جنجل !!


يا وطن .. زٌفة كَمرياعراكَ زَفة كَمر


ونجوم إله إتهلهلْ !!


عذبٌني ما عذبٌك ..إكتلني ما أكتلك ..


طبع اليحب ينكتل موش اليحب يكتل


آه يا وطن يا جَذِر !!


والجذر هم بيه طبع ..


لو مات من العطش للوادي ماينزل !!
علمني الفراك ، اعزف لحن غربتي إبقيثارة أشواك


أسهر \ وحن\ وأنفعل وأتمنى واشتاك


مامش مثل ديرتي


لو نمشي طول العمر !!!مانلكًه مثل إعراكَنا إعراكَ
http://www7.0zz0.com/2008/10/28/15/778796627.jpg


خيانة منهُ لها
اناني !!
اناني وماشفت منك غير الانانية
لعد وين الوعد والاحلام ولك مو بنيناناها سويه
جنة نبني نعمر احلام!
هسة حطمتهة ولك بالله قوولي مو كافي هاي الاذية
أذية والم ودموع وحسره لعد يمته يطير طير الفرح فوق روسنة ولو بس شوية
لا تضن اني ارجعلك ولك حتى العدوو ميسوي هاي السوية
خنتني وبقيت انتضر الفرج ياا فرج هذاا وانتة ليش بقى قلب بعد خيانتك والجروح البيه!!
وألك عين توكف وتحجي والله مالي عيون اباوع بيه عليك خاين اناني وماكو بقلبك حنية
اني توقعت حبيب بس جنت غلطانة وغلطتي جانت قوووية
جرحت قلبي المسكين ولك ليش فرحت الشماات بية!!
اعتب عليك ولك لو من الصبح ليل ما تنطفي النار المشتعلة بيه
تقوولي غلطانة وقاعدة تضلمين بيه
روح ناشد الناس خلي يحكموون وتشوف اني شكد تحملت الاذية!!
تحملت وماخنت عمري بس الضاهر عفت الحب وايامه ولك شتريد بعد كل هذي الدموع االلي بيه
لو بيه اموت اموت بس ما أعيش هالعيشة الردية
أعلنت علم الاستسلام لان الوحووش قامت تنهش بعضمي واني ابجي على الحال اللي عليه!
سلام على دنية هيج واللي يعجبني يقولون ترى الدنياا وفية!!!!!!



بقلم الخاص للعضوة المشاركة

http://www7.0zz0.com/2008/10/28/15/788404766.jpg


يلعيونـك سمـه وطـول الحواجـب لـيـل
ضمنـي بسمـه عيونـك اسـهـر واغـفـه
ويــا ضــي الـوجـه يالماطفـيـت بـيـوم
صدكـنـي الكـمـر مــن يشتـعـل يـطـفـه
ويا قوس القزح كل ساعه اشوفك لون
ويـمـر مــرات لـونـك بـيـه مــا عـرفـه
تحـل ليـل الشعـر حــد مايـلـوح الـكـاع
وتــعــظ الــزلــوف بــــدورة الـشــفــه
طبع بينه الجـرح ندعيلـه حتـى يطيـب
الـــك بـيــه جـــرح ادعـيـلـه مايـشـفـه
وتسالـنـي شعـجـب ماوصفيـتـك يـــوم
وانـه الحـايـر بظـلـك لـسـه مموصـفـه
يـبـو صــوت اليـغـرد ياسـحـر فـيـروز
الــك اجـمــل لـحــن بشـفـافـك تـعـزفـه
تمر مثل النهـر والخطـوه روجـة مـاي
واظل آنه اعله جرفـك حاصـد الوسفـه
ويالخصـرك مـدور كـمـر عـالـي بعـيـد
مـــد ايـــده الـكـلـب مــالاحــك بـجـفــه
ويكولـون التمـر ينضـرب بـيـه امـثـال
اشـو جبـت التبـرزل صـار الـك حشفـه
مـن عينـك نـده ينـزل وشـوفـه يطـيـح
يـلــتــم بـــــورود جـفــوفــك الـتــرفــه
تلتـف اعلـه طولـك كــل نـجـوم اللـيـل
ويـجـي يـنـام الكـمـر متـوسـدك صـفـه
واظـم سـرك عليـه ومــا ابـوحـن بـيـه
واذا دمـعــك بعـيـنـك عـيـنـي لـتـذرفــه
كل اصبـع بجفـك يضـوي شمعـه بليـل
وكـل خصلـة شعـر مــن كذلـتـك عـفـه
يــا جـمـار عـالـي ومــا اظــن تـنــلاح
لان عثـكـك هـــدل ماشـالـتـه السـعـفـه
اذا بميـزان انتـه وكـل حــواري العـيـن
مـاظــنــن لـغــيــرك تــنـــزل الــكــفــه
احلـى مـن العسـل بالشفـه مـن تنظـاك
ومــرح مـثـل النسـيـم ودمــك شـخـفـه
حدر زيجـك نهـر مضمـوم مـا ينشـاف
لان الله طـبـكـهـا الـضـفــه عـالـضـفــه
يـــا اول نـــده يـنـكـط شـعــر لـلــروح
ويلـمـشـذر مـحـبـه وضحـكـتـك زفــــه
شمـس الله واكبـر نزلـت اعـلـه الـكـاع
اجـــت يـمــك حبـيـبـي تـريــد تـتـدفــه

*********************************

هذه القصائد المشاركة في المسابقة
اتمنى التوفيق للجميع
وانتظر تصويتكم

[عيون عليا]

حبيباتي العضوات انتهاء فترة التصويت
7\11\2008
يعني يصادف بعد 9 يوم ان شاء الله
الموفقية للجميع

[عيون عليا]

لتذكير بقوانين المسابقة
قوانين المسابقة يمنع جذب العضوات باارسال رسالة خاصة لتصويت للقصيدة

جوائز المسابقة

1. تثبيت القصيدة

2. ختم الموضوع بالتميز

3. توقيع هدية

[3sal_alnahrain]

عاشت ايدج عيون حبيبتي
وتم التصويت
والموفقيه للجميــــــــع

[عيون عليا]

شكرا للمرور
نورتي حبيبتي

[بديل القمر]

تم لتصويت قلب
مع اني احترت شختار تلهن حلوات

[عيون عليا]

اي صح والله كلهن حلوات
منورة عزيزتي

[fulla86]

تم التصويت
بالتوفيق

[شمس بغداد الحبيبه]

تم التصويت وبالتوفيق ان شاء الله
لجميع المشتركات

[Queen.Ur.Heart]

تم التوصويييييييييييت

وثانكس
عالمسابقة الحلوة

لو جنت اعرف لكان شاركت لان عندي شعر شعبي

يلا عالجايات ان شاء الله

[Queen.Ur.Heart]

الرابط الي بتوقيعج عيون عليا ميشتغل

عدلي حبيبي

[عيون عليا]

شكرا للمرور حبايبي
عيوني كوين جان نورتينا لو مشاركة ان شاء الله على الجايات
حبيبتي شكرا على التنبيهه
نورتن حبايبي

[¤~¤moon light¤~¤]

تم التصويت
وعاشت اناملج ع هل اشعر روعه

[حبي]

تم التصويت قلبي

[عيون عليا]

مشكورات حبايبي على المرور القيم
نورتن

[يسورة]

تسلم إيدج عيون الغالية
مجهود رائع والموفقية للجميع والفوز لصاحب الحرف الأوقع بالقلب انشالله

وتم التصويت عمري

[عيون عليا]

منورة حبيبتي
شكرا للمرور